Сыр бойы

Бұл бос сөз емес. Нақты атқарылған жұмыстың жемісі. Шындығында кейінгі кезеңде Қазалы ауданында  тындырылған толымды тірліктер аз емес. Соның арқасында көркі көз тойдыратын елді мекендердің қатары ұлғая түсуде. Осындай көріністі би әрі батыр Басықара бабаның есімімен аталатын ауылдан анық байқауға болады. 

Ағымдағы жылы Басықара бабаның дүниеге келгеніне 260 жыл толмақшы. Мерейтой аясында ауылды абаттандыруға  аудандық бюджеттен 121,8 млн. теңге қаржы бөлінген болатын. Бұл қаржыға  ауылдың бас қақпасы жаңаланып, кіреберістегі 618 метр жерге жарықшамдар қойылды. Қазіргі таңда ауыл орталығынан «Басықара баба» атындағы аллея салынуда. Аллеяға бабамыздың бюсті қойылмақшы. Оған қоса орталық алаң, жастар алаңы, балалардың ойын алаңының құрылыстары жүргізілуде.Сондай – ақ  Қадірбай Есенов пенҮрмәш Түктібаев атындағы  көшелер асфальттанды.

 Кеңес Одағының батыры Үрмәш Түктібаевтың 100 жылдығына орай батыр баба  есімін иеленген ауылды абаттандыру жұмыстарына да бюджеттен  қаржы қаралған - ды. Оның ішінде  абаттандыруға  аудандық бюджеттен 63 млн. теңге,  ауылдағы алты көшеге жөндеу жұмыстарын жүргізуге облыстық, аудандық бюджеттерден 76 млн. теңге бөлінді. Нақты кезеңде ауыл орталығынан «Тағзым» алаңы мен «Жастар» алаңы жасалуда. Жаңадан бой көтерген «Тағзым» алаңына Үрмәш батырдың бюсті орнату көзделуде. Сонымен қатар, ауылдық клубтың айналасы қоршалып, орталықтағы әлденеше  көшеге жөндеу жасалуда.

Ағымдағы жылы  Қазалы қаласының атауына да 150 жыл толатыны көпшілікке мәлім. Осы тұрғыда қаладағы абаттандыру жұмыстарына бюджеттен 434,3 млн. теңге бөлінгенін атап кетсек. Бүгінге дейін қала көшелерінің қиылыстарына  бағдаршамдар,   көшелерге түнгі жарықшамдар орнатылды. «Жастар алаңының» құрылысы қарқынды жүргізілуде. Алдағы уақытта «Ардагерлер алаңы» абаттандырылып,  қаланың 150 жылдығына арналған монумент орнатылады. Оған қоса №18 жасөспірімдер спорт мектебінің ғимараты мен спорт алаңын абаттандыру,  орталық көшелерге жаяу жүргіншілер жолы мен бордюр салу қолға алынуда. Сондай – ақ бес  көше орташа жөнделіп, бес көшеге қиыршық тас төселіп жатқанын айта кетсек.

Жұмабек Табынбаев,

Қазалы ауданы.