Сыр бойы

Кеше «Рза-Агро» ЖШС-нің Ғ.Мұратбаев ауылындағы егіс алқабында күріш орағының басталуына орай дәстүрлі «Дала күні» семинар-кеңесі өтті. Семинар-кеңеске қатысушылар алдымен Жалаңтөс баһадүр және Жанқожа баба кесенелерінде болып, құран бағыштады. Бұдан соң егістікке бет алып, пленарлық мәжіліске қатысты, деп хабарлады «Қазалы» аудандық газетінің сайты.

Жиналғандарды алғашқы егін орағымен құттықтаған аудан әкімі Н.Шамұратов дихандардың жыл сайын табысты еңбек етіп, қамбаны мол астыққа толтырып келе жатқандығын ерекше атап өтті.

Биыл дала еңбеккерлері 17355 гектарға ауылшаруашылығы дақылдарын орналастырса, оның ішінде, негізгі дақылымыз күріштің көлемі 6800 гектар. Оның 5150 гектары үстеп қоректендірілсе, 5550 гектарына арам шөптерге қарсы химиялық өңдеу жасалынған.

«Алдағы міндет, ел ризығын шашпай-төкпей, жауын-шашынға ұрындырмай жинап алу» деген аудан әкімі Н.Шамұратов алғашқы сөз кезегін аудандық ауыл шаруашылығы бөлімінің басшысы Өтеп-Әлі Өміртайға берді.

Бөлім басшысының мәлімдеуінше, аудан бойынша 17 355 гетарға орналастырылған дақылдардың 7210 гектары дәнді дақыл, 470-і майлы, 2250-і картоп, көкөніс, бақша өнімдері болса, 7405 гектары мал азықтық дақылдар. Егілген егістіктен межеленген өнім алу үшін шаруашылықтар 4221 тонна минералдық тыңайтқыштар және арам шөптерге қарсы 5140 литр гербицид сатып алған. Бүгінге дейін 410 гектар жаздық бидай түгелімен жинап алынған, гектардың орташа түсімі 10,5 центнерден айналады. Сонымен бірге 4210 гектар ескі жоңышқаның 600 гектарын тұқымға қалдырып, одан 11 тонна тұқым алынған. 3610 гектарына екі орым жүргізіліп, барлығы 6786 тонна өнім жиналған. Қазір 2595 гектар жерге орналастырылған жаңа жоңышқаны жинау жұмыстары жүргізілуде. 71 мың тонна табиғи шөп дайындалып тұр.

Тамыз айының ортасында басталған 460 гектар мақсары дақылы түгелімен жиналып, 170 тонна өнім алынған. Сүрлемдік жүгері дақылын жинауды да шаруашылықтар бастап кетті. Егін орағына 70 комбайн, 48 жатка, 160 трактор, 54 жүк көлігі және 62 трактор тіркемесі сақадай сай. Күріш орағына түсетін 7 жатка мен комбайн шетел фирмаларының жоғары сапалы техинкалары. Бұл техинкалардың барлығы да қосалқы бөлшектер мен қою май және жанар жағар майдың қосымша қорларымен жеткілікті көлемде қамтамасыз етілген.

Биылғы жылға егіншілік саласына барлығы 322,5 миллион теңге субсидия төленген. Семинар-кеңесте ауыл шаруашылығы дақылдарын суармалы сумен қамтамасыз етіп жүрген «Қазалысушар» өндірістік учаскесінің басшысы Қ.Көланов шаруашылықтарға кеткен судың мөлшерімен таныстырды.

Ауданнан өзге, облыс көлемінде күріш өндірісі саласында өзіндік орыны бар «Рза-Агро» жауапкершілігі шектеулі серіктестігінің биылғы күріш орағына дайындығы жөнінде серіктестік директоры Н.Имандосов былай деді:

«Рза-Агро» ЖШС биылғы жылы 4895 гектар жерге ауылшаруашылығы дақылдарын орналастырды. 2500 гектарға күріш егілді. Оның 1473-і «Лидер», 852-і «Янтарь», 60-ы ресейлік «Светлый», 50-і «Фаварит», 65-і отандық «КазЕР-6» сорттары.

Осы жылы 150 гектар бидай егіліп, әр гектарынан 12,5 центнер өнім жиналды. Бұған қоса 310 гектар мақсары дақылы егіліп, гектарынан 4 центнер өнім алынды. Мал азығы дақылдары бойынша 790 гектар ескі жоңышқа төрт тер орылып, 1500 тонна жоңышқа шөбі дайындалды. Келесі жылдың егісіне 5 тонна жоңышқа шөбі даяр. Сонымен бірге 625 гектар жоңышқаның екінші орамына дайындық жүріп жатыр. Бұған қоса 500 гектар сүрлемдік жүгері жиналу үстінде.

Серіктестік директоры күріш жинауға 3 «Джон-дир» жаткасы, 4 «Джон-дир» астық жинағыш комбайны, 7 «Енисей», «ЖРК-5» жаткасы, 5 «Енисей» астық жинағыш комбайны, 20 «Т-150» тасымал тркаторы тіркемесімен, 5 «Камаз» авиомашинасы қатыстырылатындығын да айтты.

Келесі жылдың егістігіне межеленген 4705 гектар сүдігердің осы кезге дейін 400 гектары көтерілген. Серіктестікте 247 адам тұрақты жұмыспен қамтылған. Ал маусымдық, көктем, күз айларындағы жұмыстарға 80 адам тартылған. Серіктестік тұқым өсіру шаруашылығымен де айналысатындықтан келер жылдың күріш егісіне 600 тонна I-репродукциялы «Янтарь» тұқымы, 750 тонна II-репродукциялы «Лидер» тұқымы құйылған.

Семинар соңында биылғы егін жинау науқанында баршаның биік межеден көрінуіне тілектестік білдіріліп, ақсақалдардан бата алынды. Егіс алқабына барып, аудан әкімі Н.Шамұратов және сала ардагерлері алғашқы егін орағының лентасын қиды.