Сыр бойы

Халықаралық «Экспо-2017» көрмесі аумағында Польша Республикасының ұлттық күнінің ашылу салтанаты өтті. Шараға ҚР Премьер-министрі Бақытжан Сағынтаев пен Польша Президенті Анджей Дуда қатысты.

Салтанатты жиында Премьер-министр Бақытжан Сағынтаев поляк павильоны өзін жақсы жағынан көрсетіп, көрмедегі танымал павильондардың біріне айналғанын атап өтті.

– Қазақстан Польшаны Орталық және Шығыс Еуропадағы негізгі сауда-экономикалық серіктесі ретінде қарастырады. Біз поляк үкіметі мен іскерлік орта өкілдерін БҰҰ қамқорлығындағы «Жасыл экономиканың» халықаралық орталығы аясында ынтымақтастықты нығайтуға шақырамыз. Ол Экспо-2017 мұрасы негізінде жұмыс істейтін болады. Бізде жаңартылатын энергетика, ғылым және технологиялар, инновациялар мен коммуникация¬лар, орман шаруашылығы, туризм салаларында ынтымақтастық орнатудың үлкен мүмкіндігі бар. Экономикамыздың цифрлық түрленуі мен индустрияландыру процестеріне қатысуға шақырамыз, – деді.

Сондай-ақ, Польша Республикасының Президенті Анджей Дуда шара қатысушыларына арнап сөз сөйледі.

– Біз шамамен бір жыл бұрын, Варшавада ҚР Президенті Нұрсұлтан Назарбаевпен «Экспо-2017» көрмесіне дайындық мәселесін талқылаған едік. Ал, бүгінде мен шараның ауқымдылығына таңдана қараймын, – деді Польша Президенті.

Ол Польшаны Еуропалық одақтың аса белсенді дамып жатқан елдерінің бірі екенін атап өтті. Мысалға, 2016 жылы мемлекеттің ЖІӨ өсімі 3,1 пайызды құрады. Президенттің айтуынша, 2017 жылдың болжамы бұдан да жақсарып, жұмыссыздық деңгейі айтарлықтай төмендеп келеді. Польша басшысы қазақстандықтарды түрлі салаларда, соның ішінде, алдымен экономика саласында ынтымақтастық орнатуға шақырды. Сонымен қатар, «Экспо-2017» көрмесіне қатысқан поляк билігінің өкілдері, ғалымдар мен сарапшылар болашақта қолдануға болатын үлкен тәжірибе жинақтады деген сенім жеткізді.