Сыр бойы

Қармақшы ауданының Ақтөбе ауы­лында туған жерінің өсіп-өркендеуіне үлес қосқан  Ұлы Отан соғысы және еңбек ардагері,  І дәрежелі «Ұлы Отан соғысы» және үш мәрте «Еңбек Қызыл Ту» ордендерімен марапатталған  Ерназар Сексенбаевтың 100 жыл­дық мерекесі  кең көлемде аталып өтті.

Мерекелік шара  мерейтой иесінің өмір жолы  жайлы кітап көрмесімен, «Еңбек. Ерлік. Абырой» атты ғылыми-та­ным­дық кон­ференциямен  жалғасын тап­ты. Кон­фе­рен­цияда Қорқыт ата атын­дағы Қызылорда мем­ле­кет­тік уни­верситетінің докторанты Аягөз Әбдіразақова Елбасының «Болашаққа бағдар: Рухани жаңғыру» бағдарламалық мақаласынан туындайтын мақсаттарды түсіндіріп, туған жерінің әлеуетін арттыруда аянбай еңбек еткен Ерназар Сексенбаевтай тұлғаларды ұлықтаудың маңызына тоқталды. Қорқыттану және өлкетану ғылыми-зерттеу институтының ғылыми қызметкері Бақытжан Ахметбек Елбасының  «Жалпыға ортақ еңбек қоғамы» идеясы аясында тақырыптық баяндама жасады.

Конференцияда еңбек ардагері Сәпен Аң­сатов,  Ақтөбе ауылдық ардагерлер кеңе­сінің төрағасы Өмірбай Сәденов, Е.Сексен­баевтың қызы Айнакүл Сексен­баева  мерейтой иесі туралы естеліктер айтты. Осы мерейтойға арналған кітаптың тұсаукесері өтті.

Мерекелік шара одан әрі «Ерлік пен еңбек сарбазы» атты аймақтық ақындар айтысына ұласты.  Бас жүлдені Мұхтар Ниязов жеңіп алса, І орынды Аруна Керімбек, ІІ орынды Айдос Рахметов, ал келесі жүлделі орынды Бек Шымат иемденді.

Айтыста Майра Сәрсенбаева, Күнсұлу Түркпенова, Ақсұңқар Бүркітбай  сынды жыршы-термешілер, әкелі-балалы күйшілер Берік пен Мадияр Аққалиев жыр мен күй­ден шашу шашты. Одан әрі шара аудан көр­кемөнерпаздарының концерті мен мерекелік  отшашуға ұласты.

Келесі күні ауыл орталығындағы жаңадан пайдалануға берілген саябақта Ерназар Сексенбаевтың рухына арнап ас берілді. Ауыл тұрғындары мен қонақтар ұлттық спорт түрлерінен сайысқа түсті.

Мерекелік шара барысында облыс әкімі Қырымбек Көшербаев ауыл тұр­ғындары мен қонақтарға өзінің  мере­келік ізгі тілегін жеткізіп, аймақ бойынша ел әлеуетін, оның ішінде Ақтөбе ауылы эконо­микасы мен тұрғындарының тұрмыс-тіршілігін арттыруға арналған  ілкімді істер жайында әңгімеледі. Қазақстан Рес­пуб­ликасы Парламенті Сена­тының депутаты Бекмырза Еламанов, облыс­тық қоғамдық кеңес төрағасы Самұрат Иман­досовтар  мерекелік шараға қатысу­шыларға өздерінің жылы лебіздерін білдірді.

Түс қайта ауыл сыртындағы ипподромда бәйге ұйымдастырылды.

Г.ЖАЛҒАСОВА,

Б.ЕСЖАНОВ (сурет).