Сыр бойы

Өткен аптаның жұма-сенбі күндері Қармақшы ауданы, Ақтөбе ауылында аталған өңірдің өсіп-өркендеуіне орасан үлес қосқан Ұлы Отан соғысы және еңбек ардагері, І дәрежелі «Ұлы Отан соғысы» және үш мәрте «Еңбек Қызыл Ту» ордендерімен марапатталған Ерназар Сексенбаевтың 100 жасқа толу мерейтойы  кең көлемде аталып өтті.

Ауылдық мәдениет үйінде ұйымдастырылған шарада алдымен  мерейтой иесінің өмір жолы жайындағы кітап көрмесі таныстырылды. Одан соң  аудандық мәслихат хатшысы Марат Наятұлының жүргізуімен «Еңбек, Ерлік, Абырой» атты ғылыми-танымдық конференциямен  жалғасты.

Конференцияда Қорқыт ата атындағы Қызылорда мемлекеттік университетінің докторанты Аягөз Әбдіразақова жерінің әлеуетін арттыруда аянбай еңбек еткен Ерназар Сексенбаевтың өнегелі өмір жолы жайлы, сонымен бірге аталған оқу орнының Қорқыттану және өлкетану ғылыми зерттеу институтының ғылыми қызметкері Бақытжан Ахметбек Елбасының  «Жалпыға ортақ еңбек қоғамы» идеясы аясында тақырыптық баяндамалар жасады.

Конференцияда еңбек ардагері Сәпен Аңсатов,  Ақтөбе ауылдық ардагерлер кеңесінің төрағасы Өмірбай Сәденов, Ерназар Сексенбаевтың қызы Айнакүл Сексенбаевалар  сөз сөйлеп,  мерейтой иесі туралы естеліктер айтты.

Сондай-ақ, мерейтой иесінің өмір жолына арналған кітаптың тұсаукесірі өтті. Шара одан әрі «Ерлік пен еңбек сарбазы» атты аймақтық ақындар айтысына ұласты. Есімдері елге танымал мәдениет майталмандары Алмас Алматов, Оңталап Нұрмахан және Серік Жақсығұловтардың  қазылық етуімен өткен ақындар айтысына 8 жас айтыскер қатысып, олар төрт жұп бойынша өзара сөз сайыстырды. Нәтижесінде Бас жүлдені Мұхтар Ниязов жеңіп алса, І орынды Аруна Керімбек, ІІ орынды Айдос Рахметов, ал жүлделі ІІІ орынды Бек Шымат иемденді.

Келесі күн ауыл орталығындағы жаңадан пайдалануға берілген саябақта Ерназар Сексенбаевтың рухына арнап ас берілді. Ауыл тұрғындары мен қонақтар орталық алаңда ұйымдастырылған ұлттық спорт түрлерін тамашалады.

Мерейтой иесіне арналған шара барысында облыс әкімі Қырымбек Көшербаев ауыл тұрғындары мен қонақтарға өзінің  ізгі тілегін жеткізіп, Ерназар Сексенбаевтың аймақ әлеуетін арттыруға, оның ішінде Ақтөбе ауылы шаруашылығын өрістетуге қосқан үлесін атап өтті. Сонымен бірге, Қазақстан Республикасы Парламенті Сенатының депутаты Бекмырза Еламанов, облыстық қоғамдық кеңес төрағасы Самұрат Имандосов шараға қатысушыларға жылы лебіздерін білдірді.

Одан соң иппадромда ат бәйгесі ұйымдастырылды.