Сыр бойы

Қазалы ауданында білім беру саласы қызметкерлерінің дәстүрлі тамыз конференциясы өтті. Бұл жолғы отырыс «Қазақстанның жаңғыруы 3,0 – білімнің үлесі» тақырыбын арқау етті. Кеңесте қазалылық педагогтар атқарылған істерді таразылап, болашақтың міндеттерін айқындады.

Аудан әкімі Нажмадин Шамұратов білім сапасына үлкен мән беріп, оқушыларды кәсіби бағыттау жұмыстарын күшейту, ата-аналармен тиімді әрекеттестікті қамтамасыз ету сияқты мәселелерді алдағы оқу жылында басты назарда ұстауды тапсырды.

биылғы Ұлттық Бірыңғай Тестілеу кезінде қазалылықтүлектердің облыс бойынша ең жоғары көрсеткішке ие болып, көш бастағаны белгілі. Ұстаздар қауымына алғысын білдірген аудан басшысы бұл жетістікке тоқмейілсімей,бұдан да жоғары табыстарға жетуге талпыну қажеттігін баса айтты.

Жиын барысында ауданның үздік ұстаздары мен ұжымдар ҚР Білім және ғылым министрінің Алғыс хатымен, облыстық білім басқармасы басшысының Құрмет грамотасымен, аудан әкімінің Құрмет грамотасымен және Алғыс хатымен марапатталды.

Конференцияда аудандық білім бөлімінің басшысы Ақзира Қасымова өткен оқу жылында атқарылған істерге есеп беріп, болашаққа бағдар жасады.

Тамыз кеңесі аясында білім беру ұйымдарының педагогикалық көрмесі мен инновациялық білім беру ұйымдарының робототехникамен жұмыстарының көрмесі ұсынылып, «Туған жер» бағдарламасын жүзеге асыру мақсатында электронды көрме ұйымдастырылды.

Айта кетейік, биылғы жылы Қазалы ауданында 5 апаттық жағдайдағы мектеп құрылысы жүргізілді. Бірлік, Лахалы, Майдакөл, Шилі елді мекендеріндегі жаңа мектеп ашылды. Жақын арада Шәкен ауылында да жаңа мектеп іске қосылады. Бұдан бөлек, аудан орталығындағы 5 квартал аймағынан да 300 орындық мектеп құрылыс жүргізілуде. Осымен, апаттық мектептердің проблемасы Қазалы ауданында мерзімінен бұрын толық шешіліп отыр.

Сонымен қатар, 50 жылдық тарихы бар Қ.И.Сәтбаев атындағы №216 мектептің қосымша құрылысы жүргізіліп, жаңа корпуста спорт зал, асхана, шеберхана салынды.

Мұның барлығы ұстаздар мен оқушыларға ыңғайлы орта мен лайықты білім алу үшін аймақ басшысының қолдауымен аудан басшылығы тарапынан атқарылып жатқан жұмыстар. Қазалы ауданында білім саласына жасалып жатқан осындай игі жұмыстар алдағы уақытта да жалғаса береді.