Сыр бойы

         Бүгін жаңа оқу жылы қарсаңында Қазалы ауданында 2 жаңа мектеп ашылып, пайдалануға берілді. Салтанатты шараға облыс әкімінің орынбасары Р.Рүстемов, облыстық мәслихат хатшысы Н.Байқадамов қатысты.

         Оның бірі Майдакөл ауылындағы 200 орындық №98 мектеп. 183 оқушы білім алатын білім ордасы спорт зал, медициналық бөлме, 80 орындық асхана, 120 орындық мәжіліс залымен қамтылған. Мектептің ашылу рәсімінде Р.Рүстемов барша оқушыларды жаңа ғимараттың ашылуымен құттықтап, сәттілік тіледі. Ауылдық әйелдер кеңесінің төрайымы Күләш Лекер жаңа мектептің салынғанына ауыл халқының ерекше қуанышты екендігін жеткізіп, алғысын білдірді. 11 класс оқушысы ШарханМұхаммед-Қанапия арнау өлеңін оқыды.

         Тағы бір жаңа мектеп Шилі ауылында ашылды. Мұнда 50 орындық  мектеп 20 орындық балабақшасымен ел игілігіне берілді. Мектеп заманауи оқу құралдарымен жабдықталып, балалардың сапалы білім алуына барлық жағдай жасалған. Ардагер ұстаз Қуаныш Ысмағұл шалғай ауылдан осындай зәулім мектептің салынғанына ризашылығын білдірді. Қонақтарлингафон кабинетіндегі балалардың ағылшын тілін үйрену дәрісін көріп, оқушыларға сәттілік тіледі.

         Бұдан бөлек, қонақтар Қ.Сәтбаев атындағы №216 орта мектеп жанынан жүргізілген қосымша құрылыспен танысты. Жаңа корпуста спорт зал, асхана, ер және қыз балаларға арналған шеберхана орналасқан. Құрылыс жұмыстары облыстық бюджеттен бөлінген 194,0 млн. теңгеге атқарылған.

         Айта кетейік, осыдан үш жыл бұрын Қазалы ауданында апаттық жағдайдағы мектептер саны 9 болса, 2016 жылға дейін 4 мектеп, 3 балабақша құрылысы жүргізілді. Ал өткен жылы соңғы 5 апаттық жағдайдағы мектептер құрылысы басталып, оқу жылы аяқталар тұста Бірлік және Лахалы ауылдарында пайдалануға берілді. Бүгін Майдакөл мен Шилі ауылдарының халқы да жаңа мектептің ашылу салтанатына қатысты. Шәкен ауылында да мектеп құрылысы жүргізілуде. Бұдан бөлек, аудан орталығындағы 5 квартал аймағынан да 300 орындық мектеп салынуда. Осымен, апаттық мектептердің проблемасы Қазалы ауданында мерзімінен бұрын толық шешілді.

Жазғы уақытта «Шағала» балаларды сауықтыру демалыс орталығында 6 ауысым ұйымдастырылып, әр ауысым бойынша 140 баладан, барлығы 840 бала демалды.

Мектеп жанындағы көркейту, көгалдандыру және құрылыс жасақтарына 2931 бала, Астана қаласындағы «ЭКСПО-2017» көрмесіне 774 бала, облыстан тыс қалаларға саяхат жасауға 3560 бала, аула клубтарына, спорт алаңдарына 2406-ға жуық жасөспірім қамтылды.

Ауданда 36 білім беру ұйымында барлығы 14 364 бала білім алады. Олардың 8739-ы мектепішілік  спорттық секциялар мен түрлі үйірмелерге қатысады. Сонымен қатар аудандық оқушылар үйі, Қорқыт ата атындағы балалар музыка мектебі мен «Өнер және спорт» орталығы сынды 3 қосымша білім беру ұйымы жұмыс жасайды.

Өткен оқу жылы 11 сыныпты 713 оқушы бітіріп, 458 оқушы ұлттық бірыңғай тестілеуге қатысты. Қатысу пайызы 64,2. Орташа балл 88,1-ді құрап, нәтижесінде облыс бойынша Қазалы ауданы көш бастады. «Алтын белгі» белгісін 57 оқушы, үздік аттестатты 7 оқушы  иеленді. Тестілеуге қатысқан 458 түлектің 319-ы жоғары оқу орындарының грантын жеңіп алды.