Сыр бойы

Қазақстандықтар медициналық сақтандыруға қарамастан аурулардың кейбір түрлері бойынша тегін медициналық көмек алады, деп хабарлайды ҚазАқпарат.

«Міндетті әлеуметтік медициналық сақтандыруды енгізу шеңберінде, сондай-ақ медициналық қызмет көрсету мақсатында Қазақстан Республикасы Денсаулық сақтау министрлігімен әлеуметтік маңызы бар аурулардың және қоршаған ортаға қауіп келтіретін аурулардың тізімін бекітті. Аталған нормативті-құқықтық актіге сәйкес, республиканың азаматтарына медициналық сақтандырудың бар-жоғына қарамастан, жоғарыда көрсетілген тізбедегі барлық ауруларға кепілдендірілген тегін медициналық көмек көлемінің аясында медициналық қызмет алуға болады»,-деп атап өтілген аталған министрліктің мәліметінде.

Атап айтқанда,  тізімге сәйкес, әлеуметтік маңызы бар ауруларға 13 дерт түрі кіреді.

 Олардың қатарында туберкулез; адам иммунитеті жетіспеушілігі салдарынан туындаған ауру және адам иммунитеті жетіспеушілігі вирусын тасымалдаушылар; В, С вирусты гепатиті;  қатерлі жаңадан пайда болған өскіндер; қант диабеті; психиканың және жүріс-тұрыстың бұзылуы;  балалардағы церебралды сал ауруы;  миокард инфарктісі (алғашқы алты айда); ревматизм; дәнекер тіндердің жүйелі бұзылуы;  орталық жүйке жүйесінің тұқым қуалайтын-дегенеративті аурулары;  орталық жүйке жүйесінің миелинсіздендіру аурулары; орфандық (сирек кездесетін) аурулары қамтылған.

Бұл ретте, қоршаған ортаға қауіп келтіретін аурулар тізіміне 16 ауру түрі кірді: адам иммунитеті жетіспеушілігі салдарынан туындаған ауру және адам иммунитеті жетіспеушілігі вирусын тасымалдаушылар;  туберкулез; геморрагиялық қалтырау; дифтерия; менингококк инфекциясы; полиомиелит; психиканың және жүріс-тұрыстың бұзылуы; жыныстық жолмен берілетін инфекциялар;  алапес; безгек; сібір жарасы (өкпедегі формасы); тырысқақ; оба; іш сүзегі;  А вирустық гепатиті; туляремия.