Сыр бойы

  Қызылордада құрылысшылар күні мерекесіне арналған салтанатты шара өтті. Оған Қызылорда облысының әкімі Қырымбек Көшербаев қатысып, облыстың озат 16 құрылыс ардагерін ҚР Инвестиция және даму министрлігінің «Құрмет грамотасы», «Алғыс хаты» және «Еңбек ардагері» төсбелгісімен марапаттады.

– Сіздерді кәсіби төл мерекелеріңіз – Құрылысшылар күнімен шын жүректен құттықтаймын! Мемлекет басшысы Нұрсұлтан Назарбаев «Қазақстанның үшінші жаңғыруы: жаһандық бәсекеге қабілеттілік» атты Жолдауында бізге құрылыс секторын дамытып, оның отандық экономиканың толыққанды драйверіне айналуы тиіс деп міндет қойды. Осы ретте, құрылыс саласы бойынша жыл басынан барлығы 55 әлеуметтік нысанның құрылысы жүргізілуде. Жыл соңына дейін 27 нысанның құрылысын аяқтап, пайдалануға беру жоспарланса, қалған 28 нысан келесі жылға өтпелі. Биылғы жылы облыс көлемінде құрылысы жүргізіліп жатқан апаттық жағдайдағы 12 мектептің құрылысы аяқталып, пайдалануға беріледі. Осы жұмыстарды аяқтасақ, облыс бойынша апаттық мектептердің мәселесі толықтай шешімін табады. «Ата өнері – балаға мұра» дегендей, жастарға ақылшы болып жүрген құрылыс ардагерлері, қатарларыңыз сиремесін, – деді облыс әкімі.

Айта кетейік, «Нұрлы жер» тұрғын үй құрылысы бағдарламасы аясында тұрғын үй құрылысы мен инженерлік-коммуникациялық инфрақұрылым желілерін дамытуға мемлекеттік бюджеттен барлығы 5,5 млрд теңге қаржы бөлініп, қаралған қаржыға жалпы ауданы 141,3 мың шаршы метр 41 көпқабатты тұрғын үйлердің және 91 шақырымды құрайтын 13 инфрақұрылым жобаларының құрылысы жүргізіліп, жыл соңына дейін пайдалануға берілетін болады.

Шара соңы Қазақстан эстрада жұлдыздары мен жергілікті өнерпаздардың қатысуымен мерекелік концертпен қорытыланды.