Сыр бойы

Өз басым «ынтымақты ел – ырысты» деген қанатты сөзді біздің өңірімізге бағыштап айтылғандай сезінемін. Соңғы жылдар мұғдарында облыс, аудан көлемінде көптеген игілікті істердің жүзеге асқанына куә болып жүрміз. Мәслихат депутаттарының алдында есеп берген облыс әкімі Қырымбек Көшербаевтың сөзінде атқарылған жұмыстар мен алдағы уақытта жүзеге асуға тиісті міндет-мәселелерді нақты баяндағаны белгілі. Баршасына БАҚ арқылы құлағдар болғандықтан, осындай игіліктің біздің  Бөген ауылдық округінде  де көрініс тауып жатқанын айтып, облыс әкіміне ауыл тұрғындарының ризашылығын жеткізгенді жөн санадым.

Бөген ауылдық округі аудан орталығынан 150 шақырым қашықтықта орналасқан. Негізінен балық аулап, мал өсірумен шұғылданатын алыс ауылда көптеген әлеуметтік мәселелер шешімін тапқан.  Қарашалаң, Көне Бөген елді мекендері қарайтын округ халқына екі онбіржылдық мектеп, балабақша, екі клуб, емхана, ФАП, қос кітапхана, пошта, өзге де нысандар қызмет жасайды.

«Жақсының жақсылығын айт, нұры тасысын» деген бар. Орайы түскенде  ауыл халқының көптен бері толғандырып жүрген өзекті бірнеше мәселенің түйіні тарқатылып жатқанын жеткізе кетсем деймін. Бұған дейін ауылға ауыз су автокөлікпен тасымалданып келгені жасырын емес. Енді бұл мәселенің шешімін табатын сәті қашық емес. Ауылға ішкі су желілері тартылып жатыр. Тендер жеңімпазы да анықталған. Оған қоса Kcell, Bееlin ұялы телефон байланысының антеннасын орнату үшін ауыл орталығынан жер актысы берілді. Бөген, Қарашалаңда бұл мәселе шешіледі деп күтілуде.

Жол азабын жүрген білетіні тағы рас. Бұл төңіректе тұрғындарды қуанышқа бөлеген  жұмыс қолға алынуда. «Аманөткел – Бөген» бағытындағы автожолға үшінші деңгейдегі жөндеу жұмыстары жүргізілуде. Осы жолдың сапасыздығы ауыл халқын көп уақыттан бері мазалап жүрген болатын. Бөгенге облыс орталығынан аптасына үш мәрте «Икарус» автобусы қатынайтынын, мұндай  маршрут өзге ауылдарда жоқ екенін атап кету ләзім.Бұған дейін жолаушылар мен көлік иелерін қинап келген жолдың  жағдайы да жақсаратын болғанына  жұртшылық өте қуанышты. Жөндеу жұмыстарын аймаққа белгілі «Қыран» ЖШС ұжымы жүргізуде. Сонымен қатар ауылымызға Халықаралық Аралды құтқару қорынан жаңа су таситын арнайы көлік берілгеніне де алғысымыз шексіз.

Міне, осындай халық үшін пайдалы, тұрмыс жағдайымызды жақсартуға бағытталып жүзеге асып жатқан игілікті жұмыстарға ауыл тұрғындары шынайы ризашылығын білдірді.

Әділхан ӘБДІКӘРІМОВ,

Бөген ауылдық округі 

ардагерлер кеңесінің төрағасы.

Арал ауданы.