Сыр бойы

Халқымыз қандай заман болмасын домбырасы мен бесігін ешқашан тастамаған. Атадан балаға мұра болып келе жатқан ұлттық құндылықтарымызды дәріптеу, оның тәрбиелік маңызын кейінгі ұрпаққа жеткізу – бүгінгі буынның міндеті.

Ел Тәуелсіздігіне 25 жыл толуына орай, облыс әкімі жанындағы әйелдер істері және отба­сылық-демографиялық саясат жөніндегі комис­сия­ның ұйымдастыруымен облыстық ішкі саясат басқармасының тапсырысы негізінде мектепке дейінгі мекемелер арасында балалар бесік арбасы байқауы өткізілді. Шараның ашылуында облыс әкімі жанындағы әйелдер істері және отбасылық-демографиялық саясат жөніндегі комиссия хатшысы Бибігүл Үмбетова «Тәуелсіз елге тәй басқан қадам» атты байқаудың мақсаты мен маңызына тоқталып, сайыскерлерге сәттілік тіледі.

– Еліміздің мерейлі мерейтойы аясында өткізіліп отырған маңызы зор шараны өткізудегі негізгі мақсатымыз – отбасылық құндылықтарды насихаттау, отбасындағы бала тәрбиесі мен ұлттық салт-дәстүрлерімізді дәріптеп, ұлтжанды ұрпақ тәрбиелеу болып табылады. Сондықтан да байқауға қатысушыларға тек қана сәттілік тілейміз, – деді Б.Үмбетова.

Шара басталмас бұрын А. Тоқмағамбетов мәдениет үйінің фойесінде байқауға қатысушы балабақша тәрбиешілерінің қолынан шыққан бұйымдардан көрме ұйымдастырылды. Келген көрерменнің көз жауын алатын қолөнер бұйымдары, киіз үйдің, Тәуелсіздік монументінің, Бәйтеректің бейнелері, түрлі маталар мен моншақтардан жасалған суреттер мен керуен, қолдан жасалған бесіктер қойылған. Мұндай көрнекіліктер балабақшадағы бүлдіршіндердің ой-өрісін дамытуға, танымын кеңейтуге таптырмас құрал екені анық. Мәселен, №14 «Самал» балабақшасының түрлі ертегі кейіпкерлерінен жасалған арнайы сурет галлереясы жұртшылықтың қызығушылығын тудырса, №2 «Бөбек» балабақшасы тәрбиешілерінің жасаған Тәуелсіздік монументі мен құрақ көрпеше, киіз үй, бесік сияқты бұйымдары ерекше көзге түсті. Ал, «Бегім ана» балабақшасының керуен арбасы бұрынғы ата-бабалар жүріп өткен тарихтан хабардар еткендей. Осы секілді байқауға қатысушы 12 балабақшаның көрмеге қойған дүниелерінің қай-қайсысы да ерекше тартымды.

Қаламыздағы 12 бала­бақшаның әр­қай­сысынан бір тәрбиеші мен бір бүлдіршін өзара үш кезеңді қамтитын сайысқа түсті. Алдымен бірінші кезеңнің шарты бойынша қатысушылар ел Тәуелсіздігінің 25 жылдық мерейлі мерекесіне орай түрлі сахналық қойылыммен өздерін таныстырды. Анасы мен баласы немесе атасы мен немересі болып белгілі рольдерді сомдаған сайыскерлер өткен тарихымыздан хабардар ете отырып, Тәуелсіздіктің мағынасын ашатындай қойылымды екі минут ішінде орындап шықты. Жас жеткіншектерге егемен еліміздің өткені мен бүгіні туралы ұғынықты жеткілізген бұл кезеңнің тәрбиелік маңызы зор болды.

Мұнан кейін «Бесік жырын білесіз бе, жас ана?» атты кезеңде тәрбиешілер түрлі бесік жырларын айтып, өздерінің өнерлерін көрсетті. Рас соңғы кезде бесік жырын айтатын аналардың азайып баратыны жасырын емес. Бұл тұрғыда байқаудың екінші кезеңі бесік жырының бала үшін мән-маңызын тағы бір айқындап бергендей еді. Сәби кезінен анасының ақ сүтімен бірге бесік жырын тыңдап, қазақы әуенді құлағына сіңіріп өскен ұрпақ өнегелі, тәрбиелі болып, елжанды, ұлтжанды азамат болып қалыптасады.

Байқаудың үшінші кезеңі қолөнер бұйымдарының көрмесіне ұласты. Қатысушылар қолынан шыққан түрлі бұйымдар таныстырылып, бесік арбаларынан ұйымдастырылған шеру көрермен көңілін бір серпілтті. Қызықты әрі көңілді өткен сайыстың қорытындысы бойынша бірінші орынды «Бегім ана» балабақшасы, екінші орынды «Сыр бөбегі», «Ер Тарғын» балабақшалары өзара бөліссе, үшінші орынға «Бөбек», «Қуаныш», «Сыр еркесі» балабақшалары лайық деп танылды. Сонымен қатар «Тәлімді тәрбиеші», «Өнерлі тәрбиеші», «Ибалы тәрбиеші», «Білімді тәрбиеші», «Өнерлі бүлдіршін», «Сүйкімді бүдіршін», «Талантты бүлдіршін» сияқты номинациялар бойынша марапатталды. Жеңімпаздарға облыс әкімінің орынбасары Руслан Рүстемов арнайы дипломдар тапсырды және ұйымдастырушылар тарапынан бағалы сыйлықтар берілді.