Сыр бойы

Дүние жүзіне тараған коронавирус індеті біздің елімізге де келе бастағанда «қалай болар екен?» деп уайымдағанымыз рас.  Бірақ «бізге жете қоймас» деген ой басым болды. Осылайша бейқам жүргенімізде  аты жаман ауру біздің ауылға да жетті. Әдепкіде онша елемеп едік, кейіннен қорқып қалдық. Ауылда 44 адам ауруға шалдықты, жүзден астамы олармен қарым - қатынаста болып, оқшауланды. Ауылымыз тұтастай карантинге жабылды. Аудан, облыс орталығымен қатынас тоқ­тады. Тұрғындар көшеге де шықпайтын болды. Ауылға кіреберіске тосқауыл бекеті қойылып, ешкімнің сыртқа шық­пауы, сырттан кірмеуі қатаң қадағаланды. Қамсыз отыр­ған ауыл тұрғындары үшін бұл жағдай оңай болған жоқ. Бірақ, «жұмыла көтерген жүк жеңіл» демекші, осындай қиын сәтте бізді көп болып қолдады. Облыс, аудан орталығынан тиісті сала мамандары, медицина қызметкерлері  келіп, тұр­ғындарды сабырға, төтенше жағдай талаптарын орындауға шақырып, ақпараттық, түсін­дірме жұмыстары үздіксіз жүргізілді. Алғашқы науқас тіркелісімен-ақ, ауылда тынымсыз тірлік басталып кетті. Бар үмітіміз ең алдымен ақ халаттыларда болды.  Індет ілмегіне іліккендер мен олармен байланыста болғандарды жедел жәр­дем көлігімен ауданға, облыс орталығына алып кетіп жатты.

Залалсыздандыру жұмы­сы­ның өзіне  әскерилер көптеп тар­тылды. Көрші облыстан, аудан­нан да әскерилер арнайы көліктермен келіп, ауыл түгел залалсыздандырылды.  Әскери қызмет­керлердің де еңбегі орасан зор болды. Мұндай жағ­дайда басты шарт – тәртіпке бағыну. Осы орайда әскерилер бір адамның сыртқа аттап баспауын қатаң қадағалады. Күндіз-түн демей өз міндеттерін мінсіз орындады. Соның арқасында ауыл­да тәртіпсіздік орын алған жоқ.

Тұрғындар қандай жағ­дай болмасын бір-біріне көмек­тесуге әзір еді. Аудан, ауыл әкімі тарапынан  тұрмысы төмен отбасыларын қолдау шаралары ұйымдастырылды. Ауылмен қатынас тоқтағандықтан азық-түлік, дәрі-дәрмектер  тос­қауыл бекеттеріне дейін жеткізіліп, әрі қарай үйлерге таратылды. Өзге аймақта, ел ішінде жүрген ауылдан шыққан азаматтар да қоғадай жапырылып көмек қолын созды. Олар өз қаржыларына азық-түлік сатып алып, оны көпбалалы отбасылары мен мұқтаж жандарға үлестірді. Атап айтқанда, ауылдағы  «Төңкеріс» ұжымы  ұн, күріш таратса, мал сойып, етпен қамтамасыз еткендері де болды. Сонымен бірге ауылдың ерікті жастары  да ақша жинап, көмектерін ұсынды.  Құдайға шүкір, ел ішінде жүрегі мейірімге толы, қолы ашық, пейілі кең жомарт жандар баршылық ғой.  Әлі күнге дейін қайырымды жандардан көмектер көрсетілуде. «nur otan» партиясы мен аудан әкімдігінің беріп жатқан көмегі өз алдына. Олар азық-түлікпен қатар, қорғаныш құралдарымен, дәрі-дәрмекпен қамтамасыз етуде. Қазіргі кезде індет жұқтырған азаматтар аурудан айығып, отбастарына оралып жатыр. Күдікпен карантинге жатқызылғандар да  үйлеріне келуде. Бұл, әрине, дәрігерлердің еңбегі екені белгілі.

Ең бастысы, басымызға түскен сындарлы шақта біз өзіміздің жалғыз емес екенімізді түсіндік, көптің тілеуін, қолдауын  сезіндік. Сол себепті де ауылдастарымның атынан  алғыс айтамын. Енді аз күнде ауылымыз карантиннен шығады деп отырмыз. Еліміз, халқымыз аман болып, қиындықтың бәрі артта қалсын деп тілеймін.

Құрманбек ҚАРАКЕЕВ,

Ш.Қодаманов ауылының тұрғыны,

еңбек ардагері.

Шиелі ауданы.