Сыр бойы

Қазір қауіпті кеселдің бетін қайтару басты назарда тұрғаны әмбеге аян. Осы тұрғыда  мемлекет тарапынан атқарылып жатқан толағай тірліктерге қоса көптеген азаматтар да аты жаман індетке қарсы күресте  белсенділік танытуда. Олардың қатарында түрлі мамандық иелері, еріктілер мен кәсіпкерлер де аз емес. 

Арал ауданында кәсіп­керлер тұрмысы төмен от­басыларға қамқорлық жа­сауды қолға алған болатын. «Садақаны сау­да бер!» қағи­дасын ұстанған дархан пейіл қанға сіңген дағды екені тағы рас. «Жақсының жақсылығын айт...» демекші, жомарт жүректі жайсаң жандарды оқырманға  паш етсек.

Облыстық мәслихат депутаты Мейрамбек Жұмашев  аз қамтылған отбасыларға азық-түлік таратып, тұрғын­дарға 5000 дана бетперде үлестірді. Ал  облыстық, ау­дан­дық мәслихат депутаты, кәсіпкерлер Қадірберген Бедер мен Ақыл Сәдуақасова, жеке кәсіпкер Қуанышбай Ердіқалықов мұқтаж отба­сы­ларға  қаржылай көмек көрсетті. Кәсіпкер Төребек Игіліков тұрмысы төмен отбасыларына балық шабақтарын таратып, Нұрсұлтан Ақ­мұрзаев аудандағы блок-бекеттердегі жауапты қызметкерлерге сусын үлестірді. Еріктілер мен кәсіпкерлер бекет басындағы азаматтарды ыстық тамақпен қамтамасыз етіп келеді.

Мұндай  ізгі шаралар кент, ауылдық округтерде  жалғасып, мұқтаж отбасыларды демеу мақсатында азық-түлік өнімдерімен қамтуда. Кеселдің тара­уына байланысты  тұрғындар арасында жеке қорғаныс құралдарына да сұраныс артқаны белгілі. Індеттің алдын алуға және бетперде тапшылығын болдырмауда  ауданымыздың тігін шеберханалары мен білім беру ұйымдары ұйымшылдықпен әрекет жасауда. Жеке кәсіпкер Индира Жұмашева мен Фатима Сәрсенбаева тігін шеберханаларында тігілген бетперделерді көпбалалы отбасыларға, мүмкіндігі шектеулі жандарға тегін таратты. Осынау ізгі бастаманы аудан еріктілері мен №14, 13, 83, 220, 262, 71 мектеп ұжымдары, Арал индустриалды-техникалық колледжі жалғастырып, қолдан бетперде тігіп, аудан тұрғындарына үлестірді. Осылайша аралдықтар уақытша қиындыққа қарсы  күресте көп болып жұмылуда.

Арал ауданы.

Жұмабек ТАБЫНБАЕВ,

«Сыр бойы» .