Сыр бойы

– Әкем ауруханаға ин­сульт алып түсті. Не істерімізді білмей қалдық. Жанарымызды жас жуып, ауруханаға бірге бардық. Әйткенмен, дәрігерлердің қолы алтын екен. Дәрігер Нұрлан Сопбек жағдайды өз бақылауына алып, көп көмегін тигізді, – дейді Раушан Серікбайқызы.
Ауданаралық емхана бө­лімінің меңгерушісі Нұрлан Сопбек Бірлік ауылында дүниеге келген. Науқастардың ыстық ықыласына бөленген азамат. Аудандық аурухананың жансақтау бөліміне түскен С.Рыспанбетовті қарауына алған дәрігер оның денсаулығының қалыпқа келуі үшін бар тәжірибесін салды. Нәтижесінде науқас­тың беті бері қарады.
– Медицина саласында қызмет істеп жүргеніме 20 жылдан астам уақыт болды. Мұндай диагнозбен келетін науқастар жетерлік. Сүттіқұдықтан келген науқастың жағдайы түскен кезде ауыр болатын. Қазір жақсарды. Бұл – менің ғана емес, ұжымның еңбегіне адалдығы, – дейді ­Н.Сопбек.
Дәрігердің бірінші міндеті – науқастың жанын емдеу, содан кейін тәнін емдей бастайды деуші еді. Рас екен. Ауырып келген науқастың көңіліндегі күдікті сәулелі үмітпен алмас­тырар алтын қолды дәрігерлерді қалайша адам жанының арашашысы демейсің.