Сыр бойы

Кіндік қаны тамған қоныстан амалсыздан көшкен қабырғалы қауым құтты мекеніне қайтадан ораламыз деп ойламаған да шығар. Алайда, Елбасымыз Нұрсұлтан Назарбаевтың тікелей қолдауымен өмірге келген САРАТС жобасы мүлде мүмкін еместей көрінген ғаламат істі жүзеге асырды. Ғасыр құрылысы Көкарал бөгетінің салынуымен бейнелеп айтсақ, теңіз төскейіне нәр, тамырына қан жүгірді. Құлазыған аймақта көрікті нысандар, тұтастай қалашықтар бой көтерді. Қысқасы, бәрі танымастай өзгерді. Қазіргі сәтте төрткүл дүниенің назары кемелденуге бет бұрған Арал өңіріне ауғаны шындық. Жергілікті тұрғындардың мұхит асып жететін шетелдік журналистерге әбден еті үйренген. Жөн сұрассаңыз, бірі Франциядан, екіншісі Германиядан келгендерін естисіз. Тіпті, сонау бразилиялық тілшілерді де осында жолықтырдық. Бәрінің мақсаты – теңіздің оралғанын көзбен көру. Мұны білгенде кеудеңді мақтаныш сезімі кернейді. 

Теңіздің оралуымен Арал ауданында балық шаруашылығы ерекше қарқынмен алға басты. Нақты кезеңде көптеген адамдар Кіші теңіздің жағалауында ата-баба кәсібінен нәсіп тауып жүр. Солардың бірі – Мергенсай ауылдық округіне қарасты Жалаңаш елді мекеніндегі «Жамбыл» өндірістік кооперативі төрағасы Табын Әленов. 

Толқында туып, теңізде өскен Табын еңбек жолын бұрынғы Жамбыл балық колхозында балықшы болудан бастады. Есін білгеннен түпсіз айдынмен сырласып өскен бозбала қандай ауыр жұмыстан да тартынбады. Ыждағаттылығымен жүрген ортасына тез бейімделді. Өзіне жүктелген тапсырмаларды мезгілінде әрі пісентті орындайтын елгезек мінезімен көпшілікке танылды. «Елі сыйлаған есікте отырмайды». Көп ұзамай облыстық кеңестің депутаттығына сайланды. Сайлаушылар аманатын арқалаған халық қалаулысы ретінде көпшілік көкейіндегі ұсыныстарды құзырлы орындарға батыл жеткізе білді. Жеткізіп ғана қоймай, жүзеге асуына да ықпалын тигізді. Сонан да болар, елі-жұрты есімін ілтипатпен атайтын перзентінің бірі атанды. Мың да бір шүкір. Ұжымына қадірлі болса, ұзақ жылғы төккен терінің өтеуі де. 

Кейін өз мамандығымен жұмыс атқаруды ұйғарды. Гараж меңгерушісі, «Жамбыл» өндірістік кооперативі төрағасының орынбасары, бертін келе төраға лауазымына жоғарылады. Мұнда да абыройы биіктей түсті. Кішіге ақылшы аға, үлкенге ізетті іні атанды. Алайда, қанға сіңген дағдысынан айныған кезі жоқ. Қашанда қарапайымдылықты ұлық тұтты. Перзенттерінің де санасына осыны дарытуға тырысты. 

Тәкеңнің тағы бір қасиеті тазалықты жанындай сүйеді. «Ауылдың гүлденуі – Қазақстанның гүлденуі» деген қағиданы берік тұтынады. «Жалаңаш» селолық тұтыну кооперативін құрып, ауылды көркейту, абаттандыру шараларында белсенділік танытуы соның айғағы. Елбасымыздың Жолдауындағы «Әрбір тұрғын өз ауласын таза  ұстап, үйінің іші-сыртын әрлегені жөн. Сонда елдің де еңсесі көтеріле түседі» деген сөйлемдер Әленовтің жан-дүниесімен тығыз қабысып жатқандай.

Табын Әленов ұзақ жылғы жемісті қызметінде бірнеше дүркін облыс, аудан әкімінің алғыс хаты, ҚР Ауыл шаруашылығы министрлігі Балық шаруашылығы комитетінің марапатын иеленді. Жуырда ол тағы бір қуанышқа кенелді. «Алтын күз» мерекесінде облыс әкімі Қырымбек Көшербаевтың қолынан «Озат балықшы» аталымына қоса автокөліктің кілтін сыйға алды. Қуанышыңыз ұзағынан сүйіндіргей! 

Арал ауданы.