Сыр бойы

Архитектуралық талғам биігінен қарағанда сыртқы көрік-келбеті мен ішкі жарасымы жағынан Қазақстанда әлі теңдесі жоқ мекеме деп бағаланып отырған облыстық медицина орталығы – «Сыр халқының несібесіне бұйырған киелі орын» аталып жүр. Айтудай-ақ бар. Өйткені, Сыр перзенті, дәрігер Тұрғанбай Маханов алғаш негізін салған орталықтың тұрғындарға есігін айқара ашқанына 20 жылдың жүзі болды. Осы уақыттан бері аурухана құрылымдық көрік-келбетімен де, ақадал қызметімен де ел құрметіне бөленіп үлгерді.

Осы орайда урология бөлімінің тыныс-тірлігін ерекше сөз етуге болады. Бөлімді көп жылдан бері білікті дәрігер Исахмет Бәлишаев басқарады. Бұдан басқа 3 дәрігер, 7 медбике бар. Бөлім жылына мыңға жуық науқасты емдеп шығады.

Бөлім меңгерушісі бастаған Еркін Ыс­қа­қов, Еркін Ержанов және Рашид Жос­қынов сияқты дәрігерлер ота жасайтын алтын қол­дарымен, шипалы ем-домы арқасында күн сайын алғыс арқалап жүрген ақ халаттылар. Сондай-ақ, аға медбике Ақжарқын Бисенова бастаған Серіккүл Бисенова, Майра Жүсіпбекова, Әсел Жарыл­қа­сынова, Амандық Әбсадықов, Гүлнар Төлегенова және Айгерім Телғозиева сынды медбикелер де үнемі алғыс алып жүрген жандар. Таза­лық сақшылары да абыройлы. Олардың адал қыз­меттеріне куә болып жүрміз.

Қысқасы, бөлімдегі ынтымағы жарасқан жандарға емделушілер айтар ақ тілек пен ақ бата толастамайды.