Сыр бойы

Шиелі ауданында 18 тамыз - Қазақстан Республикасының Шекара қызметінің құрылған күніне орай мерекелік қабылдау шарасы өтті. Осыған орай шекара қызметкерлері мен Тәжік-Ауған шекарасында борышын өтеген азаматтарға құрмет көрсетіліп, мерекелік медаль табысталды.

«Шиелі» шекара комендатурасына қарасты «Тұщықұдық», «Қосмаман», «Ұзынқұдық», «Далақұдық» шекара заставалары кіріп, бөлімше, Өзбекстан республикасымен жалпы 270,1 шақырым құрайтын Мемлекеттік шекара аумағын абыроймен күзетуде.

Кәсіби мерекеге арналған салтанатты шараға Тәжік-Ауған шекарасы аумағындағы әскери ұрыс қимылдарында ерлікпен қаза тапқан Ержан Әбдиевтің анасы Құндызай Сейітқазымқызына дұшпанға қалқан, халыққа қорған болған қайсар ұлды тәрбиелегені үшін, алғыс білдіріп, «Асыл ана» медалі ұсынылды.  

Аудан әкімі Әшім Оразбекұлы мерекелік қабылдау шарасынан кейін №20/19 әскери бөліміне қарасты «Шиелі» шекара комендатурасымен «Ұзын құдық» шекара заставасының тыныс тіршілігімен танысты.

«Ұзын құдық» шекара заставасында қару-жарақ пен әскери техника көрмесі ұйымдастырылды. Сала мамандары қылмыскерді құрықтау мен қоян-қолтық күрес өнерін паш етті.

Шекарашылар мойнына жүктелген міндет жеңіл емес. Күнделікті қарауылда болып, ұлт қауіпсіздігі үшін жауап беретін әскерилерді Шекара қызметінің құрылған күнімен құттықтап, еліміздің тыныштығы сарбаздардың қолында!– деп аудан әкімі сарбаздарға сенім артты.