Сыр бойы

Салауатты  өмір салтын ұстану  әрқайсысымыздың   дене тәрбиесімен  айналысуымызды, дұрыс тамақтануымызды, зиянды әрекеттерден аулақ болып, тазалық пен санитария шараларын сақтауымызды қажет етеді. 

Мектепке дейінгі жас – адам денсаулығының қалыптасу кезеңі. Бұл жаста дене тәрбиесінің ұйымдастырылуы баланың алдағы уақыттағы дамуына әсерін тигізеді. Яғни, осы кезде баланың өзіндік қасиеттері, ұйымдастырылған оқу іс-әрекеттеріне қызығушылығы және қабілеттері ашыла бастайды. Сондықтан, бала күннен қалыптасқан жеке бастың тазалығын сақтау әдеті болашақта әрбір адамның өз денсаулығына зор қамқорлықпен қарауға үйретеді. Сол себепті де, "Тазалық – денсаулық кепілі” деп бекер айтпаған. Осыған орай жуырда "Жауқазын” балабақшасында "Дені сау ұрпақ – ұлт болашағы!” атты апталық болып өтті. Шараны балабақша басшысы Бақыт Ысқақова ашты. Апталық барысында медбике Клара Әбдиева "Дені сау ұрпақ – ұлт болашағы!” атты баяндама оқыса, тәрбиеші М.Жүсіпбекова "Абайлаңыз, балақай!” тақырыбында балаларды түрлі қауіп-қатерлерден, жарақаттанудан сақтандыру үшін қауіпсіздік сабағын өткізді. Сондай-ақ, тәрбиеші М.Шегебаеваның ұйымдастыруымен "Балбөбек” тобында "Тазалықты сүйеміз – тіс тазалап жүреміз” атты ата-аналардың қатысуымен тәрбие сағаты, тәрбиеші А.Сейтенованың ұйымдастыруымен "Балдырған” тобында "Денсаулық – зор байлық” тақырыбында ертеңгілік өтті. Осындай түрлі шаралар арқылы жас балғындардың бойына салауатты өмір салтын ұстау, жеке бастың гигиенасын сақтау, жат қылықтардан аулақ болу секілді тағылымды тәрбие берілді.