Сыр бойы

Елбасы өз Жолдауында: «Төртінші өнеркәсіптік революция дәуіріне, технологиялық, экономикалық және әлеуметтік салалардағы терең және қарқынды өзгерістер кезеңіне қадам басып келеді»,– деген еді. Сондай-ақ, кәсіпорындарды жаңғыртуға және цифрландыруға бағытталған, өнімнің экспортқа шығуын көздейтін жаңа құралдарды әзірлеуге де баса назар аударылғаны белгілі.

Бұл тұрғыда Жақсықылыш кен­тіндегі халықты жұмыспен қамтып отырған ірі өндіріс орны «Аралтұз» акционерлік қоғамы бірқатар игі істерді тындыруда. Біршама уақыт бұрын «Аралтұзда» қайта құру жұмыстары атқарылып, өндiрiске «тұзды екiншi рет байыту» техно­логиясы енгiзiлді. Қазіргі уақытта тұзды жуу, майдалау, йодтау және кептіру шаралары талапқа сай, жоғары деңгейде жүзеге асуда. Жаңа инвестордың келуі «Аралтұз» АҚ өміріне өзгеріс әкелді. Оған қоса, Елбасы қолдауымен жүзеге асқан индустриялық-инновациялық дамудың мемлекеттік бағдар­ламасы – бизнесті дамытуға зор әсер етуде. Кәсіпорында ас және техникалық тұз өндірісін ұлғайту жобасының іске қосылуы – сөзіміздің айқын айғағы. Тұз өндіруге арналған испаниялық «Construcciones Mecanicas J.SERRA, S.A.» компаниясының құрал-жаб­дық­тары алынды. Осылайша, жаңа зауыттың іске қосылуымен еңбек өнімділігі 1,7 есеге дейін ұлғайды. Өткен жылы аталған қоғамда 1200-ге жуық адам еңбек етті.  

Жолдауда айтылған адами капи­тал – жаңғырудың негізі, білім берудің жаңа сапасын қалып­тастыру, жаңа бағдарламалар бо­йын­ша қайта оқыған мұғалімдер жалақысын 30-50 процентке арттыру, сапалы жұмыспен қамту, үздік денсаулық сақтау ісі, дені сау ұлт қоғамның басты байлығы екені басы ашық жайт. Кенттегі №19 орта мектепті  2016-2017 оқу жылында бітірген түлектер арасынан төрт оқушы «Алтын белгі», бірқатар шәкірт жоғары оқу орындарының, «Серпін» бағдарламасы грант­тарын иеленді. Сонымен қатар, мек­тептегі деңгейлік курс бітірген мұ­ғалімдер жаңартылған білім беру жағдайында «Ізденіс және нәтиже» атты аудандық семинар өткізді. Семинар жұмысы гумани­тарлық және жаратылыстану ба­ғытында жүрді. «Жақсықылыш» дәрігерлік амбулаториясының ұжымы халық денсаулығын ны­ғайту жолында мейлінше сапалы қызмет жасауда. Сайып келгенде, Елбасы Жолдауынан туындайтын міндеттерді жүзеге асыруда атқарылатын шаралар жан-жақты пысықтала беретін болады.