Сыр бойы

«Әрбір өлкенің халқына қорған, ыстығына сая, суығына пана болған баһадүр бабалары бар. Олардың есімін ұрпақтары ұмытпауға тиісті» деген Елбасы лебізі  Жанқожа батыр ауылында нақты  көрініс тапқандай. Себебі, бұл күні осыдан тура 160 жыл бұрын  Жанқожа батырдың бастауымен Ресей патшасының  жазалаушы әскерлерімен болған, тарих парағына «Арықбалық шайқасы» атауымен енген шешуші ұрыста мерт болған асылдарды еске алуға арналған шара өтті. Сол бір қандықасапта арманда кеткен арыстарын жоқтағандай ауа райы да қытымырланып, салқын ызғар еседі. Күздің нарды құлатар қара суығы сәт санап күшейе түскен. Сұп-суық дымқыл ауа ауыр шайқаста қазаға ұшыраған боздақтардың ақтық деміндей елестегенде денем түршікті. Жаратқанға, батыр баба аруағына іштей жалбарынып, ондай ғаламат соғыстың қайталанбауын тіледім.

Тағылымды шара аудан әкімі Нажмадин Шамұратов бастаған ел ағалары мен азаматтарының  «Тағзым» алаңындағы монументке гүл шоғын қоюдан басталды. «Сарқұл қожа» мешітінде Қайрат қажы Дәуіржанұлы «Арықбалық шайқасы» батырларының рухына құран бағыштап, бабаларды еске алды. Аудан басшысы халқымыздың тарихына тоқталып өтті.

– Ғасырлар қойнауында қазақ жұртының көрмеген азабы, шекпеген қасіреті жоқ. Соның бірі – «Арықбалық шайқасы» деген атпен тарихта қалған көтеріліс. Бүгінгі шара сол шайқаста Жанқожа батыр бастаған сарбаздардың ерлігін дәріптеу,  өскелең ұрпақты отансүйгіштікке баулу, өткен тарихымызды қастерлеу мақсатында өткізіліп отыр.  Жаңғыру жолында бабалар мирасын, ізгі қасиеттерді қайта түлету қажет, – деді ол.  

Одан соң «Арықбалық шайқасы» атты  театрландырылған қойылым көрермендердің жанарына жас үйірді. Қойылым қаһармандарын сол батыр бабалардың тікелей ұрпақтары – ауыл өнерпаздары аса сәтті сомдады.  Сонымен қатар, Индира Назарова басқаратын аудандық кітапхана ұжымының кітап көрмесінде Жанқожа батырдың өнегелі өмірі, ерлікке толы даңқты жолы  әсерлі деректермен беріліпті.

Шара аясында конференция өтіп, ғалымдар мен ұстаздар баяндама жасады. Соңында батырлар рухына арналып ас беріліп, спорттық ойындар мен гала-концерт ұйымдастырылды.

Жұмабек ТАБЫНБАЕВ.

Қазалы ауданы,

Жанқожа батыр ауылы.