Сыр бойы

Кеше облыс әкімдігінде «Діни экстремизм мен терроризмге қарсы күреске арналған тың психологиялық әдіс» атты семинар-тренинг өтті. Терроризмге қарсы облыстық комиссия және облыстық жұмылдыру дайындығы басқармасының ұйымдастыруымен өткен шараға облыс, аудан әкімдіктеріне қарасты дін және жастар саласының қызметкерлері қатысты.

Қазіргі кездегі діни экстремизм лаңкестікпен қатар аталады. Лаңкестік мемлекеттік билік өкілдері мен қарапайым азаматтарды өлтіру, жарылыс, шабуыл,  ұшақтарды айдап салу және тағы басқалардан тұрады. Бүгінгі күні бұрынғыдай діни экстремизм лаңкестікке өз мақсаттарына жету құралы ретінде жиі қаралады. Бұған әлемнің түкпір-түкпірінде болып жатқан көптеген фактілер дәлел болып отыр.

Семинарды жүргізуші республи­калық ақпараттық-насихаттық топ эксперті Лола Шакимованың ай­­туын­ша, лаңкестік жасаушы ең бастысы өзінің іс-әрекетінің психологиялық эффектісіне және адамдардың эмоциясы мен инстинк­теріне, ырымшылдығы мен жалған сеніміне сүйенеді дейді.

– Қазіргі замандағы діни экстремизм – бұл барша адамзат ­проблемасы. Ол қиын, әрі түсініксіз. Сондықтан бізге оған қарсы сала мамандарын психологиялық тұрғыдан дайындауымыз қажет. Бұл өз кезегінде жемісін беріп келеді, - дейді арнайы қызмет ардагері, психолог Лола Сергеевна. 

Жат діни ағымдардың іс-әрекеттеріне, экстремизмге тосқа­уыл қоюдың ең негізгі құралы ол – профилактика, яғни ақпараттық-насихат жұмыстарының тиімді жүргізілуі. Осыған қатысты Елбасы Н.Назарбаев өзінің «Қазақстан – 2050» Стратегиясы»: қалыптасқан мемлекеттің жаңа саяси бағыты» атты Жолдауында: «Бізге қоғамда, әсіресе жастар арасында діни экстремизмге қарсы профилактиканы күшейту қажет» деп, бағыт-бағдар берген болатын.

Экстремизмге қарсы күрес жүр­гізуді екі жолмен жүзеге асы­руға болады. Ең алдымен, «оқшауланып» кетпеген, экстремистік идеология­ның қақпанына түспеген халықты ескерту және олардың арасында профилактикалық жұмыстарды белсендірек атқару.

Мұндай жұмыстарға жоғары білімді, білікті дінтанушылармен қатар, психологтар, педагогтар, қоғамдық ұйымдар мен құзыретті органдардың қызметкерлері бірлесе үйлесімді атсалысып, ақпараттық-насихаттау жұмыстарын тағы да тиімдірек жүзеге асыру қажет. Ал екінші жол бойынша «оқшауланған» идеологияға жақтасқандармен ке­шенді түрде тікелей жұмыс жүргізу, айла-тәсілдерін зерттей отырып оларды психологиялық тұрғыда қайта иландыру жолдарын іске асырған жөн.

Қорытындылай келе, отбасы, қоғам болып жұмылып, жастары­мызға діни-рухани, патриоттық, дәстүрлі ұстанымдар мен сенімнің негізінде тәрбие беру арқылы олар­ды түрлі деструктивті әрі ради­калды-экстремистік ықпал­дар­ға қарсы иммунитетті қалып­тас­­тыруға болады. Дәстүрлі діни-мәдени құн­дылықтар мен отан­­сүйгіштікке негізделген қоғам не­ме­се халық қана өміршең келіп, өзі­нің жарқын болашағына қол жеткізеді.

Нұрбек ДӘУРЕНБЕКОВ.