Сыр бойы

Биыл Елбасы Н.Назарбаевтың «Болашаққа бағдар: рухани жаңғыру» атты мақаласы жарияланғаны белгілі. Руханиятымыздың алтын қазығы, қазақ халқының ғасырлар бойы қалыптасқан салт-дәстүрі, әдет-ғұрпы, мәдениеті мен өнері екендігі көпке аян. Тек үлкен қала орталықтарында ғана емес, шалғайдағы ауылдардың мәдениеті мен өнерінің жаңғыруы сондағы клубтар мен мәдениет үйлеріне тікелей қатысты.

Қуаныш бөліссең, көбейеді. Осы орайда үстіміздегі жылы Қазалы ауданында да жағымды жаңалықтар баршылық. Солардың бірі – жақын арада халық игілігіне беріледі деп отырған Қарашеңгел округіне қарасты Жалаңтөс батыр ауылдық клубы.

Былтыр осы ауылда пайдалануға берілген көркі көз тартатын «Сәуле» балабақшасының ашылу салтанаты кезінде облыс әкімі алдағы уақытта ауылда жаңа мәдениет ошағы бой көтеретінін жеткізген еді.  Міне, енді сол клуб жуырда пайдалануға берілмек.

Қазіргі таңда «Болашақ» ЖШС 150 орындық клуб­тың құрылысын жүргізуде. Құрылыс басталғалы бері ауылдың 5 тұрғыны тұрақты жұмыспен қамтылуда. Жаңа нысан туралы Қарашеңгел ауылдық округі ақса­қал­дар кеңесінің төрағасы Сайын Дәуітовтен сыр тартқан едік.

– Біздің ауылымыз Елбасы­ның түрлі бағдарлама­ларынан, игі істерінен шет қалып көрген жоқ. Айтар болсақ, «100 мектеп, 100 аурухана» бағдарламасы аясында салынған жаңа мектеп пен еңселі емхана жұмыс істейді. Сонымен қоса, былтыр ғана пайдалануға берілген 90 орындық балабақша қызмет етуде. Барлығының да игілігін ел-халық көруде. Жұмыстары жүйелі. Ал бұрынғы ескі клуб жарамсыз деп танылып, апатты жағдайда тұрған-ды. Іргетасы осыдан жарты ғасыр бұрын қаланған мәдениет ошағының күйі ауыл тұрғындарының да көңілін күпті еткенін көзбен көрдік. Іштей қынжылатынбыз. Іс-шаралар өткізуге ауылдық клубтың болмауы айтар­лықтай кедергілер келтіретін. Енді сол шешімін таппақ. Қазіргі таңда 150 орындық ауылдық клуб ғимараты салынып жатқаны тәуелсіз мемлекетіміздің, Елбасының байыпты саясатының айқын көрінісі деп білеміз, – дейді ауыл ақсақалы.

Қазіргі таңда Жалаңтөс батыр ауылдық клубы уақыт­ша бұрынғы амбулатория ғимаратына орналасқан. Онда ән, би, домбыра және көркемсөз оқу үйірмесі жұмыс жасайды.

Ән үйірмесінде он төрт оқушы, би үйірмесінде он екі оқушы, домбыра үйірмесіне тоғыз оқушы қатысады. Сонымен қоса көркемсөз оқу үйірмесінде он оқушы тәлім алуда. Білуімізше, барлық өнерпаздар іс-шаралар мен байқауларға атсалысып отырады екен. Үйірме мүшелері ұйымдастырылып жатқан республикалық, облыстық, аудандық іс-шаралардан қалыс қалмай, өз өнерлерін көрсетіп, жүлделі орындарға ие болып жүргендігі көңіл қуантты.

Жаңа нысан пайдалануға берілгеннен кейін де жалаңтөстік өнерпаздар жоғары жетістікке толы жолынан жаңылмайтынына сеніміміз кәміл.

Есет ТАБЫНБАЕВ.

Қазалы ауданы.