Сыр бойы

Кеше Қызылорда қаласында төтенше жағдай орын алып, 3 адам оқиға орнында қаза тапты. Бұл туралы облыстық өңірлік коммуникациялар қызметінде өткен брифингте «Қызылорда су жүйесі» МКК директоры Нұржан Диханбаев хабарлады.

Мекеме басшысының айтуынша, төтенше жағдай 26 шілде күні сағат 13:00 шамасында кәсіпорынның теңгеріміндегі Шымбай көшесінде орналасқан №1 КНС-тың насос қондырғысын жоспарлы жөндеу кезінде орын алған.

– Насостық қондырғыларды жөндеу барысында тереңдігі 8 метр болатын КНС-тың төменгі бөлігінде 4, жоғарғы бөлігінде 6 адам жұмыс істеген. Кенеттен жарылған газдың әсерінен төменде жұмыс жасап жатқан 4 адам уланып, оларға көмек көрсету мақсатында КНС-тың аумақ басшысы қоса түскен. Нәтижесінде жоғарыда жұмыс жасаған 5 адам орта деңгейдегі улану диагнозымен сыртқа шығарылып, жедел жәрдем көрсетілген. Ал төменде болған машинист Ерлан Омаров пен көмекке келген аумақ басшысы Сәтбек Смағұлов оқиға орнында көз жұмды. Төменде жұмыс жасаған кәсіпорынның машинисі Болат Саудабеков пен жөндеуші Самат Кубатов жедел жәрдеммен қалалық және облыстық аурухананың жан сақтау бөліміне жеткізілді. Ал, мекеменің жөндеушісі Бақытжан Боранқұлов қалалық ауруханаға жеткізу жолында қайтыс болды.

Қазіргі таңда оқиға орнында аталған жағдай бойынша құқық қорғау органдарымен тексеру жұмыстары жүргізілуде, – деді Нұржан Әбілханұлы.

Брифингке қатысқан ҚР ІІМ ТЖК Қызылорда облысы бойынша ТЖД басшысының орынбасары Саид Молдақараев, облыстық жұмылдыру дайындығы басқармасы басшысының орынбасары Ерлан Бакиров орын алған төтенше жағдайға байланысты жедел жұмыстар атқарылғанын тілге тиек етсе, Қызылорда қаласы әкімінің орынбасары Асылбек Шәменов қайтыс болған азаматтардың отбасыларына 1 млн теңгеден материалдық көмек көрсетілетін жеткізді.

Жеңісбек АЙЫМҚҰЛОВ.