Сыр бойы

Өткен аптаның сенбі, жексенбі күндері Қызылорда қаласындағы «Еуразия» спорт кешенінде қоғам қайраткері, Қармақшы ауданының құрметті азаматы Болатбек Сүлейменовті еске алуға арналған дзюдодан жастар арасында  халықаралық турнир өтті.

Туған жердің туын еңкейтпей, аймақ дамуына азаматтық үлесін қосқан ел ардақтысын еске ала отырып, жастардың саламатты өмір салтымен өсіп жетілуін мақсат тұтқан байрақты бәсекенің ашылу салтанатында облыс әкімінің орынбасары Руслан Рүстемов құттықтау сөз сөйледі.

Ол айтулы турнирдің жыл сайын қанатын кеңге жайып, осы шараның шапағатымен  көптеген батыл, жігерлі, отан­сүйгіш жастардың қалыптасып келе жат­қанына тоқталды, жарыс қатысу­шыларына жеңіс биігін тіледі.

Мұнан соң турнир қонағы, Б.Бұл­қышев атындағы Қазақстан жастар одағы және Ұлттық Олимпиада комитеті сыйлықтарының иегері Қыдырбек Рысбек сөз алып, осындай дүбірлі спорт мерекесін жыл сайын жандандырып келе жатқан Сыр бойының елшіл азаматтарына, Сүлейменовтер әулетіне алғысын білдірді.

Сонымен бірге қоғам қайраткері, ҚР ҰҒА академигі Бақберген Досманбетов ұрпаққа өнеге болған Болатбек Сүлейменовтің ұстынды тұлғасына сөз арнап, жас балуандарға жарқын болашақ тіледі.

Биыл он жетінші мәрте ұйымдасты­рылған дүбірлі бәсекеге еліміздің 9 облысынан және Өзбекстан мен Қыр­ғызстан елдерінен 27 команда келіп, 260 татами шебері турнир жүлделерін 16 салмақ дәрежесінде  сарапқа салды.

Екі күнге созылған дзюдошылар додасы спорт кешені ішін қиқуға бөлеп, жанкүйерлердің көңілінен шықты. Соңғы жылдары Қызылорда спортының жаңа сапаға көтеріліп, жерлестеріміздің тек жеңіс тұғырынан ғана көріне бастағанын жұртшылық жақсы біледі. Оған осы өткен төрт-бес айдағы «Қазақ­стан барысы» атанған Еламан Ерғалиев пен бокстан өткен әлем чемпионатында күміс жүлдегер атанған Қамшыбек Қоңқабаевтың атын атасақ та жеткілікті.

Ал, бұл бәсекеде сырбойылық ер балуан­дардың жеңіске деген аса құш­тар­лығы танылмады. Оның басты себебі, белгілі шеберлердің шет асып, түрлі жарыс­­тарға қатысу үшін жол үстінде жүр­гендігі. Оған «жүлдені қонақ алса екен, сый-құрметімізді еліне айта барса екен» деген қонақжайлылығымыз да қосылды. Дегенмен, қызылордалық қыздардың та­та­мидегі тартысы өте белсенді көрінді. Мәселен, 44 кілә салмақта сынға түскен қыздар арасынан екі жерлесіміз озды, 1-ші орынды Бибіхан Нәбиева, 2-ші орынды Ақтоты Зәріп жеңіп алды. 48 кілә салмақта да қызылордалық қос қызымыз Аружан Темірғали мен Назерке Әбілтаева жеңіске жетті.

Жігіттер арасынан Оңтүстік Қазақ­стан облысы мен Өзбекстаннан келген балуандар жиі көзге түсті. Жеңім­паздардың барлығы мойындарына медаль тағып, ақшалай сыйлықпен марапатталды.

Турнир қонағы, бокстан Қазақ­стан құра­масының бас бапкері Мыр­зағали Айтжанов осындай дүбірлі жарыстардың Сыр елінде өте жоғары дәрежеде ұйымдас­тыры­латынын айта келіп: «Жастарды намыс пен жігерлі­лікке тәрбиелеп жатқан ­Болатбек әкеміздің бел баласы Сағатбек Сүлей­менов бастаған ел азаматтарына мың алғыс. Сіздер аймақтың ғана емес, қазақ елі спортының дамуына зор қолдау көрсетіп отырсыздар» – деді ақеден алғысын білдіріп.

Біздің сөзіміздің түйіні де – осы.

Д.АЯШҰЛЫ.