Мың алғыс сізге, дәрігер!

Дүниежүзін жайлаған қауіпті індетпен күресте ең алдымен, ақ халатты абзал жандарға күш түсіп отырғаны белгілі.  Мылтықсыз майданның алдыңғы шебінде жүрген дәрігерлер қауымына деген жауапкершілік жүгі індет жұқтырғандар саны артқан сайын еселеп ауырлап келеді.

Елімізде де медицина мамандары алғашқы науқас анықталған сәттен бастап, бірнеше апта бойы отбасыларынан тысқары жүріп, өз денсаулықтарын қатерге тігіп дертпен күресуде. Өйткені бар үміт – дәрігерлерде. Осы орайда мемлекет басшысы Қасым-Жомарт Тоқаев індетпен күресте аянбай еңбек етіп жүрген медицина қызметкерлерін барынша қолдау керектігін айтып, оларға үстемақы төлеу туралы шешімін жеткізді. Сондай-ақ, мамандардың қауіпсіздігін қамтамасыз етуді тапсырған болатын. Президент тапсырмасы біздің өңірімізде де қажетті деңгейде жүзеге асырылуда.

Денсаулық сақтау басқар­масының дерегінше, облыс­та індетпен күреске 3000-ға жуық медицина қызметкері жұмылдырылған. Ауру анық­талған аудандардағы медицина қызметкерлері мен облыс­тық жұқпалы аурулар ауруханасының мамандары емдеу мекемелерінен шықпай жұмыс істеуде. Медицина қыз­мет­керлері де  14 күндік ба­қы­лауда болады. Осы орайда оларды жатын орынмен қамтамасыз етуде қажетті шаралар қолға алынуда. Оған кәсіпкерлер де атсалысуда. Атап айтқанда, қызылордалық кәсіпкер коронавируспен күресіп жүрген дәрігерлерді жекеменшік қо­нақүйіне орналастырды. Осы­­лайша ол бүгінгі күннің батыр­ларына деген құрметін көрсетті. Қонақүйде медицина қыз­меткерлерінің тынығып, демалуына бар жағдай жасалған.

– Індетпен күресіп жүрген дәрі­герлерге, орта және кіші буын қызметкерлердің бар­лы­ғына қолайлы жағдай жасалған. Ыстық тамақ, жатын орын, қажетті жеке бас гигиенасы зат­тарымен және қорғаныш құрал­дарымен қамтамасыз етіл­ген. Жұмыстан кейін олар арнайы медициналық көлікпен қонақүйге барып тұрақтайды, – деді облыстық денсаулық сақтау басқармасының басшысы Жақ­сылық Әбдусаметов. 

Бүгінде қонақүйде 100-ден астам қызметкер орналас­ты­рылған. Оларға көпбейінді облыс­­­тық аурухананың мамандары қызмет көрсетеді. Тазалық, залал­­сыздандыру жұмыстарын жүр­гізумен қатар, індетпен кү­ресушілердің дене қызуын өл­шеп, медициналық тексерістен өткізеді.

Сондай-ақ, Мемлекет бас­шысы міндеттегендей, індет­пен күресуші медицина қызмет­керлеріне қауіптілігіне байланысты 3 деңгейде сыйақы  тағайындалуда. 3 айға есептелген сыйақыны алатын қызметкерлер тізімін арнайы комиссия бекіт­ті. Өткен аптада комиссия мүше­лері  тәуекел топтары бойынша үстемақы белгіленетін жұмыс­керлер тізімін айқындады. Облыс бойынша 375 медицина қыз­меткері үстемақы алатын болды.

 Атап айтқанда, 1-тәуекел тобына (20 ең төменгі жалақы мөлшері (ЕТЖ) немесе 850 мың теңге) жататын инфекциялық стационардағы дәрігерлер – 9, орташа медициналық қызметкер – 14, кіші медициналық қызметкер – 12, барлығы 35 адам қосымша 5,7 млн теңге (Облыстық жұқ­палы аурулар ауруханасы, Жаңа­қорған ауданаралық ауруханасы);

2-тәуекел тобына (10 ең төменгі жалақы мөлшері (ЕТЖ) немесе 425 мың теңге) жататын провизорлық стационардағы дәрі­герлер – 24, орташа медици­налық қызметкер – 95, кіші меди­циналық қызметкер – 42, барлығы 161 адам қосымша 20,5 млн теңге (Қазалы, Қар­мақшы, Сырдария, Жаңа­қор­­ған ауданаралық ауруханалар, облыстық жұқпалы ауру­лар ауруханасы және облыс­тық ме­дициналық жедел жәрдем стансасы);

3-тәуекел тобына (5 ең тө­менгі жалақы мөлшері (ЕТЖ) немесе 212,5 мың теңге) жататын карантинды стацио­нардағы дәрігер – 15, орташа медициналық қызметкер – 64, кіші медици­налық қыз­меткер – 72, жедел жәрдем жүргізушісі – 28, барлығы – 179 адам,  қосымша 7,9 млн теңге алады (Қазалы,  Шиелі, Жаңақорған ауданаралық ауруханалар, облыстық меди­циналық жедел жәрдем стансасы, облыстық жұқпалы аурулар ауруханасы, облыстық фтизио­пульмонологиялық орталығы).

Үстемақы қызметкерлердің наурыз айында коронавирус инфекциясын жұқтырған нау­қастармен нақты жұмыс жасаған уақытына сай есептеледі.

«Әлеуметтік медициналық сақтандыру қоры» КЕ АҚ облыс бойынша филиалының директоры Бақыт Исмаханбетовтің айтуынша, ағымдағы жылдың наурыз айында COVID-19 корона­вирусы таралуының алдын алу және инфекция жұқ­тырған науқастарды емдеуге 238,8 млн  теңге бөлінді. Сондай-ақ, эпидемияға қарсы шараларға тартылған медициналық немесе медициналық емес ұйымдардың қызметкерлеріне 150,9 млн теңге­ден астам үстемақы қарас­тырылған. Оған қоса, полимеразды тізбекті реакция арқылы биологиялық материалдан COVID-19 вирусының РНҚ (рибонуклеин қышқылы) анықтау үшін диагностикалық зерттеуге 60,2 млн теңге бөлінген.

«SENIM» Денсаулық сақтау жүйесі жұмыскерлерінің сала­лық кәсіптік одағы» респуб­ликалық қоғамдық бірлестігінің  облыс­тық филиалы да  індетке қарсы күреске бейжай қарамай, меди­ци­налық ұйымдармен бір­лесе жұмыс атқаруда.

Індетке қарсы күресіп жүрген қызметкерлерге көмек көрсетіп, қуаныш сыйлау мақсатында облыс көлеміндегі емдеу алдын алу мекемелерінде жұмыс істейтін бастауыш кәсіподақ ұйымдарының төр­аға­ларымен бірлесіп, 4370 мың теңгеге барлығы 250 отбасына азық-түлік өнімдерін берді. Сонымен бірге, облыстық жұқпалы аурулар ауруханасына 370 мың теңгеге 185 дана төсек жиынтығын табыстады. Облыстық жедел жәрдем станциясына 200 мың теңгеге 2000 дана бетперде (маска) тігуге жабдықтар алып берілген. Одан бөлек, 600 мың теңгеге облыс көлеміндегі емдеу мекемелерінің қажеттілігіне орай, адам денесінің температурасын өлшейтін (бесконтактный термометр) құрал сатып алу мақсатында келісім шарт жасасқан.

Салалық кәсіподақ 5540 мың теңгеге облыс көлеміндегі медицина саласының қызмет­керлеріне көмек көрсеткен.

Тұрғындар саулығы жолында аяқтарынан тік тұрып, уақытпен санаспай еңбек етіп жүрген бүгінгі күннің батырлары – медицина қызметкерлері  қандай да қолдау-құрметке лайық.

Айнұр БАТТАЛОВА,

«Сыр бойы».

Денсаулық 14 сәуір 2020 г. 608 0