Сыр бойы

Облыс ґкімінің орынбасары Наурызбай Байқадамов қаладағы бірқатар емдеу, алдын алу ұйымдарының жұмысымен танысты.

Көпбейінді облыстық ба­лалар ауруханасы өңірдегі 18 жасқа дейінгі 286033 ба­лаға стационарлық, ста­цио­нар алмастыру, жедел трав­ма­то­логия­лық және кеңес беру - диаг­ностикалық көмек көр­се­теді. 350 орындық ауру­ханада 12 клиникалық, 3 хирур­гиялық бейім­­дегі және 2 парак­линикалық бө­лімше бар. Сонымен бірге ауы­сымына 300 бала қабылдайтын кеңес беру-диагностикалық бө­лімшесі жұмыс істейді. Мұнда 92 дәрігер, 308 орта буын медицина қызметкері еңбек етеді. Дәрігермен қамтылу көр­сеткіші 81,4 процент. 32 дәрігер республикалық орта­лықтарда, шетелдерде білімін жетілдірген. Емделу­шілер ара­сында ауылдық жерлерден келу­шілер саны 2,4 процентке өскен. Былтыр емделіп шыққан науқас­тардың ішінде тыныс алу жүйесіне шағымданғандар үлесі көп, яғни, 32 процентті құрады. Онан кейінгі кезекте 19 процентпен жүйке жүйесі аурулары болса, үшінші орында  жарақат пен уланулар. Сонымен бірге туабітті ақаулармен емдел­гендер саны 7 процентке жет­кен. Үш жыл көлемінде ота саны 19 процентке өскен.

Кеңес беру-диагностикалық бөлімшесінде 19 маман жұмыс істейді. Сондай-ақ, ЭКГ, УДЗ, ЭХОКГ зерттеулері бар. Аурухана – аймақтың емдеу ұйымдары қызметкерлерін «Ба­лалық шақтағы ауру­ларды ықпалдастыра ем­деу» кур­сынан өткізуші коор­динатор.

Облыс әкімінің орынба­са­рына аурухананың бас дәрігері Зоя Көшенова міндетті әлеуметтік медициналық сақтандыру жү­йесі бойынша атқарылып жат­қан жұмыстарды таныстырды. 

Айта кету керек, жаңа жүйемен жұмыс істеуде ба­сым бағыттың бірі  – профи­лактикалық шаралармен бірге оңалту, қалпына келтіру емін жүргізу. Осы орайда мұнда ІІ, ІІІ кезеңді қалпына келтіру ем шаралары жүргізіледі. Бұл үшін физиотерапия және оңалту бөлімшелері жаб­дық­талған. Бөлімшеде физиоем­ша­ралары, емдік уқалау,  дене­шы­нық­тыру бөлмелері мен тұзды шахта, бассейн жұмыс істейді. Ем­делушілердің басым көп­шілігі, оның ішінде неврол­гия­лық науқастардың 80 проценті фи­зиотерапия бөлімінде ем қабылдайды.

– МӘМС жүйесінің басты мақ­саты – қалпына келтіру емін күшейту. Ал жалпы меди­цинаның мақсаты – ауру­дың алдын алу. Жаңа жүйе бойынша жыл басында 60 төсектік қалпына келтіру бөлім­шесін  аштық. Оның 35-і жүйке жүйесі ауруларына арналса, 15-і ортопедия-трав­матологиялық, 5-і кардио­хирур­гиялық,  тағы 5-і нейро­хирургиялық орын. Сонымен бірге  жыл басында 15 төсектік мейірбикелік күтім  бөлімі ашылды. Ол ауыр жағдайдағы, яғни отадан кейінгі кезеңде балғындарға күтім жасауға арналған, – деді бас дәрігер.

Облыс әкімінің орынбасары онан соң №3 қалалық емханада болды. Онда пациенттің өзіне-өзі қызмет көрсетуі үшін орна­тылған терминал  және «Дамумед» мобильді қосым­шасының  жұмы­сымен, сон­дай-ақ, МӘМС жү­йесінің жүзеге асырылу бары­сымен танысты.

Емхана ауысымына 500 адам қабылдауға арналған. Тір­келген 63706 тұрғын 38 жалпы тәжірибелік-дәрігерлік, 5 аку­шер­лік-гинеко­ло­гиялық ай­маққа бөлінген. Меди­ци­налық мекемеге «Сәулет», «Арай», «Самал», «Саяхат», «Сырдария», «Астана», «Шұ­ғыла», «Ипподром» және «СПМК-70» шағын аудан­да­рының тұрғындары қарайды. Емханада 105 дәрігер, 300 орта буын қызметкер жұмыс істейді.

Call-орталығындағы 4 қыз­­меткер тұрғындар тара­пынан келіп түскен қоңы­рауларға жауап береді. Орталық  телефоны арқылы дәрі­герді үйге шақыруға, дәрігер қабылдауына жазылуға бо­лады. Сонымен бірге МӘМС бойынша сұрақтар, шағымдар мен алғыстар да, порталға қатысты сұрақтар да қойылып, оларға жауап беріледі.  Емханада пациенттердің өзіне-өзі қызмет көрсетуіне арналған 3 терминал жұмыс істейді. Терминалда  барлық дәрігердің  жұмыс кестесі көрсетіліп тұрады. Келуші өзі қалаған маман қабыл­дауына жазыла алады. Емхана бас дәрігері Гүлстан Мақсұтованың ай­туынша, МӘМС жүйесі ая­сында ауқымды жұмыстар ат­қарылған. Ең бастысы, бүгінде емханаға тіркелген 63706 адамның әлеуметтік мәртебесі анықталған. Сондай-ақ, цифрландыру бағы­тында да бірқатар нақты жұмыстар бар.

Н.Байқадамов ай­­мақ­тағы сто­ма­тологиялық кө­мек­тің қолже­тімділігі, қыз­мет түрінің кеңеюі, алдағы жос­пар­лармен де танысты. Оған қоса республикалық «Әлеу­меттік оңал­туды дамы­тудың ғылыми-прак­тикалық орталығы» облыстық фи­лиа­лының жылдық жұмысын да саралады.

Аталған орталықтың не­гізгі мақсаты – кохлеарлы имп­лантталған балалардың естіп-сөйлеуін дамыту, оқыту мен тәрбиелеу. Облыста мұндай 95 бала бар. Бір жылда 50 балғын оңалтудан өтіп, оң нәтижеге жеткен.

Наурызбай Сейітқалиұлы ем­деу ұйымдарының жұмы­сына оң бағасын беріп, алдағы уақытта жаңа жүйе бойынша атқарылатын жұмыстар назар­да болатынын жеткізді.

– МӘМС жүйесі бойын­ша оңалту, яғни, қалпына келтіруге басымдық беріліп отыр. Ендеше  медициналық мекемелер өз жұ­мыс­тарын осыған бағыттауы керек. Бұл медициналық көмектің қолжетімділігінің артуына, сапа­сының жақсаруына мүмкіндік береді, – деді Н.Байқадамов.

Айнұр БАТТАЛОВА,

«Сыр бойы».