Сыр бойы

 Елбасы өзінің 5 әлеуметтік бастамасында еліміз үшін маңызды мәселелерді айқындап берген болатын. Оның ішінде  әлемдік стандарттарға сай білім беру жүйесін қалыптастыра отырып, студенттердің білім алуына және тұратын жеріне жағдай жасауға тиісті назар аударуымыз қажеттігін айтып өткен еді. Осыған орай қазір жүйелі жұмыс жасалуда. Оның жай жапсары облыс әкімінің орынбасары Евгений Кимнің төрағалығымен мемлекеттік-жекеменшік әріптестік негізінде орта білім беруді жан басына нормативтік қаржыландыру мәселесі бойынша өткен басқосуда айтылды. Оған еліміздің өзге өңірлерінің білім басқармасының басшылары мен орынбасарлары, жергілікті мектеп және колледж директорлары қатысты.

Жиынды ашқан Е.Ким өңірде МЖӘ аясында  атқарылып жат­қан жұмыстарды таныстырды. Оның айтуынша, бүгінгі күні ай­мақта 34 млрд теңге көле­мін­дегі 75 жоба жүзеге асырылады. Оның 10-ы білім саласын қамтиды.

– Қазіргі сәтте сол жағалауда қарқынды құрылыс жұмыстары жүруде. 26 көпқабатты тұрғын үй, 320 орынды балабақша мен «Болашақ» университетінің кампусы және жастар орталығы бой көтеруде. Бұған үлкен құрылыс компаниялары мен инвесторлар ерекше қызығушылық танытты. Сонымен бірге қазір МЖӘ негізінде 200 орынды екі жатақхананың жобасы жүзеге асырылуда. Десе де, мемлекеттік-жекешелік әріптестік жобасы барысында туындайтын мә­селе­­лер де жоқ емес. Мәселен, осы­дан үш жыл бұрын апатты жағ­дайдағы 13 мектепті қай­та салу жоспарланған. Бірақ бай­қауға ешқандай инвес­тор қы­­зығушылық танытпады. Әлеу­­меттік жобаның  ин­вес­тор­­лық тартымдылығы бол­ма­ған­дықтан,  бұл бірнеше жылға со­зылып бюджетке шы­ғын әке­летін болды. Осыған байланысты мем­лекеттік-жекешелік әріп­тестік қағидаларынан бас тартуға ше­шім қабылданды. Дегенмен, мектеп, балабақша, колледж салуда әріптестік оң тиімділігін береді, – деді ол.

Мұнан кейін сөз алған “Қазақстандық мемлекеттік-же­ке­меншік әріптестік орталығы” АҚ басқарма төраға­сының орын­басары Талғат Матаев елі­мізде МЖӘ бойынша ат­қа­ры­лып жатқан жұмыстарға, шіл­де айында білім заңына енгізілген өзгерістерге тоқталса, орталықтың атқарушы директоры Талғат Тұрсынбаев мемлекет тарапынан көрсетілетін қол­даулар мен мемлекеттік-жеке­шелік әріптестіктің тиімділігін сөз етті.

– Өздеріңіз білетіндей, Елбасы үндеуінің үшінші бастамасында 2022 жылдың соңына дейін студенттерге арнап кемінде 75 мың орындық жаңа жатақхана салу тапсырмасы алға қойылды. “Қазақстандық мемлекеттік-жекеменшік әріптестік орта­лығы” АҚ құрылыс жұмыс­тарын жүргізіп қоймай, бұрынғы жатақханаларды қайта жаңғырту жұмыстарын жасау әдісін ұсынып отыр. Бұл мемлекеттік әріптеске де, кәсіпкер үшінде тиімді болмақ. Себебі, кәсіпкер қолданыста тұрған немесе салған ғимаратын жатақхана ретінде бере алады. Оған мемлекет тарапынан қолдау бар. Яғни, мемлекеттік тапсырыс арқылы жаңа құрылыстың  әр жатын орнына 122 айлық есеп көрсеткіш, модернизация, қайта құруға 47 айлық есеп көрсеткіш көлемінде қаржы төлейді. Оған қоса, ол жатақхана қарапайым болмауы тиіс. Студенттер үшін қолайлы, қажеттіліктерін өтейтіндей болуы қажет, – деді Т.Тұрсынбаев.

Ал, облыстық білім бас­қар­масы басшысының орынбасары Жасұлан Шынтасов өңірде сту­денттерді жатақханамен қамтуда тиісті шаралардың атқарылып жат­қандығын жеткізді. Қызыл­ордада 16 мемлекеттік колледж болса, оның 5-де жатақхана қарас­тырылмаған. Біреуіне жатақхана салу қажеттілігі туындап отыр.

Жиын барысында “Қаржы орталығы” АҚ департамент директоры А.Қабыланова орта білім беруді жан басына нор­мативтік қаржыландыру туралы ақпарат берді. Нормативтік қаржыландыру жағдайында бі­лім беру ұйымының ұйым­дас­­тырушылық және қар­жы­лық мәселелерін бас­қару­­дың тиімділігі артып, бі­­лім беру процесінің нәти­же­лілігі жоғарылайды. Орта білім беруді жан басына нор­мативтік қаржыландырудың мәні білім беру процесіне шы­ғыс­тарды республикалық дең­гейде орталықтандыруға жә­не қаражатты бір жылда бір оқу­шыға есептеп бөлу­ге не­гіз­деледі. Бөлінетін қара­жаттың көлемі оқушылар санына байланысты.

Басқосуда қатысушылар тара­пынан түрлі сұрақтар қойылып, жан-жақты талқы­ланды. Шара соңында “Қазақ­стандық мемлекеттік-жеке­меншік әріптестік орталығы” АҚ мен еліміздегі білім бас­қармаларының арасында әріп­тестік меморандумына қол қойылды.

Мейрамгүл ДАУЫЛБАЙҚЫЗЫ,

“Сыр бойы”.