Сыр бойы

«Құндылықтар жүйесінде бі­лім­ді бәрінен биік қоятын ұлт қана табысқа жетеді» деген еді Елбасымыз. Шындығында білім маз­мұнын жаңарту аясында мектеп мұғалімдері кәсіби даярлау курстарынан өтіп, жаңалықты тәжірибеге ендіру жұмыстары да қадамдап іске асып келеді. Мұғалімдер дәстүрлі оқыту үдерісінен жаңаша сипаттағы сабақтар даярлауға жаппай бетбұ­рыс жасауда. ХХІ ғасырдың кең ауқымды дағдыларын меңгерту бағы­тындағы коммуникативтік құ­зы­­реттілікті қалыптастыратын, мұ­ға­­лім мен оқушының  сыни ойлау мүм­­кіндігін кеңейтуге жұмыс жасайтын тыңдалым, айтылым, оқылым, жазылым дағдыларының сабақтарда қолданылуы өзгерістің алғашқы сатыларын көрсетуде.

Дәл осындай бағытпен жұмыс жүргізуді жолға қойған Қызыл­орда қаласындағы М.Дүйсенов атындағы №15 мектеп-лицейі БҰҰ-ның Даму Бағдарламасы жариялаған жобаға қатысып, жоба грантын ұтып алған еді.

«SAMSUNG» компаниясы де­меу­шілік жасайтын жоба арқылы мек­теп-лицей ұжымы 10 сотық жерге көлемі 200 шаршы метр жылыжай салды. Қазірдің өзінде жылыжайда 360 түп қияр, 40 гүл сұрпы, пияз, ас­көк секілді көкөністер құлақтанып тұр.

Жақында осы мектеп-лицейде «Білім мазмұнын жаңарту ­аясын­да педагогтың кәсіби шеберлігін дамыту» атты қала мектептерінің мұға­лімдері қатысқан семинар болып өтті. 

Семинарды ашқан қалалық білім бөлімінің басшысы А.Нұр­сейітов мектеп-лицей тәжірибесін пайдалана отырып, басқа мек­теп­тердің де жобаларға қатысуға мүмкіндігі бар екенін атап өтті. Мұнан соң, мұнай саласы кәсіподағының басшысы, білім жанашыры Елеусін Дүйсенов сөз алып, жаңа бастамаға құтты болсын айтты, батасын берді.

Игілікті істің нәтижесі арқылы оқушылар сабақтағы теориялық білімін іс-тәжірибемен ұштастыруға, зерттеу жұмыстарын жүр­гізуге бейімделеді. Сондай-ақ, ­балалар ең­бекті құрметтеуге, туған жерін сүюге, ауыл шаруашылығы маман­дығын таңдауға талаптанады. Ал, оқушылар мен ата-аналар бірігіп жасалған өнім мектеп асханасына өткізіледі және ұстаздар ұжымының кіріс көзіне айналады.

Бұл жөнінде мектеп-лицей директоры Күміскүл Серекеева былай деді: «Осыған дейін №268 орта мектеп ұжымын басқардым. Осы мектепте жүргенімде 4 рет Даму Бағдарламасы аясындағы жобаға қаты­сып, соның нәтижесінде мек­тептің жылыжайы салынды, жеміс бағы отырғызылды. Әр жылға жылыжай өнімін айтпағанда бұл мектеп биыл алма бақтарының алғашқы жемістерін де жейді.

Мектеп-лицейге келген соң да өз тәжірибеме сүйеніп, ұжыммен бірге тағы да жоба жеңімпазы атандық. Тұрақты демеушіміз бізге  жылыжай жабдықтарын, Израйльдің тамшылатып суғару әдісімен қолданылатын құрылғыларын сатып алып берді. Бұл істің де игілігін көретін күн жа­қын.

Біз тәрбие жұмысындағы еңбек­тің роліне баса көңіл бөлген мектеп-лицей ұжымына өз тарапымыздан сәттілік тіледік.

Қалалық семинар жұмысы мектеп мұғалімдерінің физика, математика, робототехника, ­география, қазақ тілі пәндері бойынша өткізіл­ген көрнекі сабақ үлгілеріне жал­ғасты.

Дүйсенбек АЯШҰЛЫ,

«Сыр бойы».