Әлеуметтік сала әркез басымдыққа ие

 Облыс әкімі Гүлшара Әбдіқалықованың қатысуымен мәслихаттың кезектен тыс 44-сессиясы өтті. Бейне-конференция форматында ұйымдастырылған сессияда 2020-2022 жылдарға арналған облыстық бюджетті нақтылау мәселесі қаралды деп хабарлайды облыс әкімінің баспасөз қызметі.

Әлемдік экономикадағы жағдай мен баға тұрақсыздығы және коронавирус инфекциясының таралуына байланысты Президент Қасым-Жомарт Тоқаев осы жылдың 8 сәуірінде «2020 жылға арналған республикалық бюджетті нақтылау туралы» Жарлыққа қол қойған болатын.

«Бүгін біз осы Жарлықтан туын­дайтын міндеттер мен Мемлекет басшысының тапсырмасын жергілікті жерде жүзеге асыру үшін облыстық мәслихат сессиясының күн тәртібіне 2020-2022 жылдарға арналған облыстық бюджетті 34,8 млрд теңгеге нақтылап отырмыз. Ақпарат ретінде айта кетейін, бұл қаржының 25,9 млрд теңгесі республикалық бюджеттен бөлініп отыр. Енді осы қаржының негізгі бағыттарына қысқаша тоқтала кетейін», – деді облыс әкімі.

Аймақ басшысының айтуынша, бюджеттен қаралған қаржының 2,6 млрд теңгесі мемлекеттік атаулы әлеуметтік көмек беруге, 1,5 млрд теңге – әлеуметтік кепілдендірілген пакетке, оның ішінде төтенше жағдайға байланысты аз қамтылған отбасыларды азық-түлік және тұр­мыстық жиынтықпен қамтамасыз етуге бағытталады.

Ал еңбек нарығын дамыту, оның ішінде жалақыны ішінара субсидиялау, жастар практикасына, «NEET» санатындағы жастарға, табысы төмен көпбалалы отбасыларға, еңбекке қабілетті мүмкіндігі шектеулі жандарға, жаңа бизнес идеяларға берілетін гранттарға және қоғамдық жұмыстарға 4,3 млрд теңге қарастырылған.

«2020-2021 жылдарға арналған жұмыспен қамтудың Жол картасы» мемлекеттік бағдарламасына республикалық бюджеттен трансферт ретінде 9,1 млрд теңге бөлінуде. Қаржы аймақта жаңа жұмыс орындарын ашуға, тұрғын үй-коммуналдық шаруашылығы, инженерлік-көлік инфрақұрылым жобаларын жүзеге асыруға және әлеуметтік-мәдени нысандарды жөндеу мен елді мекендерді абаттандыруға жұмсалады.

Ауыл тұрғындарының өмір сүру сапасын жақсартуға бағытталған «Ауыл – ел бесігі» бағдарламасы бо­йынша облыста маңызды саналатын 22 жобаға 3 млрд. теңге бөлінеді.

Сонымен қатар, «Бизнестің жол картасы-2025» мемлекеттік бағдарламасы шеңберінде несиенің пайыздық мөлшерлемесін субсидия­лау мен шағын және орта бизнес несиелерін кепілдендіруге 1,7 млрд теңге қаралады.

Бұдан бөлек, аймақ басшысы облыстық бюджет қаражатының жұмсалу барысына тоқталып өтті.

«Аймақта жүзеге асырылып жатқан құрылыс, энергетика, мәдениет, спорт, электр және сумен жабдықтау салаларындағы 49 жобаны қоса қаржыландыруға 3 млрд теңге, Арал, Қазалы, Жалағаш, Шиелі аудандарында тұрғын үй салуға құнды қағаздарды шығару есебінен 895,5 млн теңге бөлінетін болады. Сонымен қатар, білім, денсаулық, мәдениет және спорт салаларына 516 млн теңге қаралады. Ал  құқық қорғау органдарының материалдық-техникалық базасын нығайтуға 219 млн теңге жұмсалады», – деді облыс әкімі.

Сессия қорытындысында аймақ басшысы облыстық мәслихат депу­таттарының бюджет жобасын нақ­тылауға белсенді қатысқандары үшін алғыс білдірді.

БИЛІК 23 сәуір 2020 г. 423 0