Жаңа номер

Сыр бойы

syrboyi@yandex.kz

+7 (7242) 40-02-17

Тұрақты бақылау - көп түйіннің шешімі

Бүгін облыс әкімі Гүлшара Әбдіқалықованың жетекшілігімен аппарат мәжілісі өткізілді. Маңызды жиында өзекті мәселелер жан-жақты талқыланды. Алдымен, аймақ басшысы бірқатар кадрлық өзгерістің орын алғанын айтып, жаңадан тағайындалған орынбасарлары – Серік Жүсіпұлы Сүлейменов пен Серік Әбжәліұлы Ахметті таныстырды.

Мұнан соң ауыл шаруашылығы, жер қатынастары, индустриалды-инновациялық даму, кәсіпкерлік және туризмді дамыту салаларына жауапты облыс әкімінің орынбасары Бахыт Жаханов Мемлекет басшысының жұмыссыз жастарға арналған «Жұмыспен қамтудың жол картасы» бағдарламасы жайлы тарқатып айтты. Аталған бағдарлама 2020-2021 жылдар аралығында жүзеге аспақ. Оның әсіресе жұмыссыз жастарға берері көп. Мемлекет оларға тиісті жалақы төлей отырып, су тасқынына қарсы іс-қимылдарға, көктемгі егінге, құрылысқа және басқа да жұмыстарға тартуды жоспарлап отыр. Біздің облыста бұл шараларға 37 млрд теңге қаралды. Қомақты қаржының көмегімен 276 жоба іске асып, соның негізінде 9 мыңға жуық жаңа жұмыс орындары ашылады деп күтілуде. Бұдан бөлек, тұрғын үй, мектеп, ауылдық клубтар мен спорттық алаң секілді ондаған нысанның құрылысына қарқын беріледі. Сонымен қатар екі елді мекенді газдандыру ісіне, көпір құрылысы, тозығы жеткен жолдарды жөндеу жұмыстарына да назар аударылады.

Жиында аймақтағы қауіпті індетпен күресте нақты қандай шаралар қолға алынғаны жөнінде облыстық жұмылдыру дайындығы басқармасының басшысы Қайратбек Сәрсенбаев баяндады. Қайратбек Әубәкірұлы қазір облыстық жедел штабтың жұмысы жүйелі жолға қойылғанын, қажетті сала мамандарының барлығы тартылып, тиісті құралдардың алынғанын айтты. Сондай-ақ, төтенше жағдай кезінде тәулігіне 24 сағат 400-100 байланыс нөмірінде «Call Centre» жұмыс істейтінін, бүгінгі күнге дейін тұрғындар оған 800-ге жуық сұрақпен хабарласқанын мәлімдеді. Бұдан бөлек, басқарма басшысы залалсыздандыру жұмыстарына баса мән беріліп жатқанын алға тартты. Дегенмен, Шиелі ауданында осы істі тиісті деңгейде ұйымдастыру керек, себебі ауданда соңғы уақытта жұқпалы індет көптеп тіркелуде.

Жалпы, өңірде санитариялық-эпидемиологиялық ахуалға байланысты бірқатар шектеу шаралары енгізілген. Тек талапқа бас ию керек. Қажетті жұмыстар қолға алынып жатыр. Мәселен, облыстық жұмылдыру дайындығы басқармасымен 40 мыңға жуық бетперде, 250 литр антисептикалық құрал мен 100 келі деохлор алынған. Облыстық денсаулық сақтау басқармасының қаржысы есебінен 1500 литр антисептик пен 350-ге жуық төсек жабдықтары да сатып алынды. Тосқауыл бекеттері де қатаң тәртіптегі жұмысты жалғастыруда. Алайда, жауапты мамандар осы бекеттерде тепловизордың жетіспеушілігі барын жасырмайды. Ал, оған қол жеткізу үшін жергілікті қазынадан тиісті қаржы бөлінуі тиіс.

Отырыста қала және аудан әкімдері селекторлық байланыс арқылы қосылып, ахуалмен бөлісті. Жиын соңында аймақ басшысы жауапты сала басшыларына жұмысты одан әрі күшейтуді тапсырып, сын сағатта ахуалдың тұрақтылығын сақтауды жүктеді.

Мөлдір ҚАЛЫМБЕТ,

«Сыр бойы».

БИЛІК 06 сәуір 2020 г. 713 0