Сыр бойы

   Қызылорда облысының әр деңгейдегі әкімдері мемлекеттік және жекеменшік әріптестік әдісін дамытуды жетілдіру үшін Астанаға арнайы сапармен барды. 

Екікүндік семинарға 65 ауыл мен 7 аудан әкімі және Қызылорда  қаласының әкімі қатысуда. Оларға  жаңа әдістерді Ұлттық экономика министрлігіне қа­рас­ты   «Қазақстандық мемлекеттік-жеке­меншік әріптестік орталығының» сарапшылары үйретпек.

Қазір елімізде мемлекеттік-жеке­меншік әдісіне басымдық берілуде. Бұл салада арнайы заң қабылданып, көптеген жобалар жүзеге асырылып отыр.  Сондай-ақ, жаңа реформа бойынша ауыл әкімдеріне дербес бюджет беру де қаралған.

Кеше «Qazaqstan» телеарнасына сұхбат берген Жаңақорған ауданының әкімі Ғ.Әміреев осы сапардың мәнісіне тоқталды. «Бюджеттен бөлінетін қаржы 3 жылға жоспарланады. Мемлекеттік-жекеменшік әріптестік арқылы қаржы  тартудың бюджеттен тыс үлкен мүм­кіндігі бар. Бізге беріліп отырған облыс әкімінің тапсырмасы осындай.

«Қазақстандық мемлекеттік-жекеменшік әріптестік орталығының» үйретіп отырған тәсілдері де осы – қаржыны қалай тарту керек, жобаларды қалай іске асыру керек деген мәселе» – деді ол.

Біз мұнан шалғай ауылдар мен шағын қалалардың экономикасын ши­рату, жеке сектор мен мемлекеттің мүмкіндігін ұштастыру – негізінен ел басқарған әр азаматтың бүгінгі күнгі бірінші кезектегі жұмысы екенін көреміз. Әрине, мемлекеттің бұл талабы халықтың әлеуметтік жағдайын одан әрі көтере түсудегі тиімді тәсілдерінің бірі екендігі анық.