Көшелер көркейіп, үйлер салынады

Облыстық мәслихаттың шешімімен Қазалы ауданына 3 млрд 622 млн теңге қаржы бөлінді. Айта кетерлігі, бұған дейін де 1 млрд 318 млн теңге берілген. Бәрекелді! Енді осы қыруар қаржы қандай жұмыстарға жұмсалмақшы деген сауалдың жауабын қолдағы деректерге сүйене отырып жеткізсек. 

Қаржының 900 миллион тең­геден астамы «Ауыл – ел бесігі» бағдарламасы арқылы Бекарыстан би ауылына бө­лініп отыр. Соның арқасында аудандағы  ең ір­гелі ауылда ауыз су сер­вис­тік желіге қосылады. Елді мекендегі №24 мектепке күр­делі жөндеу жұмыстары жүр­гізіліп, 7 көше жөнделіп, 8 көшеге жарықшам орнатылады. Осылайша ауыл­дың ажары көркейіп, келбеттене түседі. Бекарыстан би ауылындағы ағайындар бұл жұмыстардың жүзеге асуын ұзақ жылдар күткен болатын. Енді бұл мәселенің де шешімі табылатын күн алыс емес. 

Көпшіліктің көкейіндегі өткір мәселе – тұрғын үй. Жуырда Әйтеке би кентінен бір қабатты 4 пәтерлі 10 тұрғын үйдің құрылысы басталады. Қолға алынатын құрылыстардың ішінде Ақсуаттағы 150 орын­дық клуб пен Ғ.Мұратбаев ауылында жүргізілетін газ желісі бар. Ғ.Мұратбаев саябағы абаттандырылса, кент­тегі былтыр асфальтталған Жа­лаңтөс батыр көшесіне жа­рықшам орнатылады. Аудан орталығындағы тозығы жеткен кәріз жүйе­сіне жөндеу жұмыстары жүргізіледі.

Салауаттылық салтын сақ­тау, бұқаралық спортты дамыту да күн тәртібінде тұрақты тұр. Қ.Пірімов, Ү.Түктібаев ауыл­дарында  балалар ойын алаңы, тренажер, жүгіру жолағы бар  спорт ойындарына арналған алаң салынады. Қолдау балғын өрендерді қанаттандырып, Олим­пиада шыңына жеткізсін дейміз.

Жолдың жайын жүрген біледі. Әлеуеті дамыған ел­дердің «байығың келсе, жол сал» деген ұстанымы да бекер емес. Бұл – әлемдік эко­но­микадағы тәжірибе. Осы бағытта Қазалы ауданында өткен жылы көптеген жұ­мыс­тар жүзеге асқан еді. Биыл  бұл жұмыстар жалғасын табады. 

Қала мен кентте жөнделетін 16 көшеге қосымша тағы 13 көшеге қосылды. Мұндай жұмыстардың қала мен кентте ғана емес, алыс  ауылдарда да жүзеге асуы – қуантарлық жағдай. Атап айтқанда, Май­дакөл, Басықара, Жалаңтөс батыр, Жанқожа батыр, Ақсуат, Кәукей, Бозкөл, Өркендеу, Абай, Ғ.Мұратбаев ауылында да көшелер жөнделеді. Бұл мәліметке жоғарыда айтылған Бекарыстан би ауылындағы 7 көшені қосыңыз. Сонымен қатар Қазалы қаласының 8, Бекарыстан би ауылының 1 көшесіне тротуар салынады. 

Көптен бері шешімін тап­паған  №226 гимназияға биыл күрделі жөндеу жасалады. С.Сей­фуллин атындағы №165 мектептің есік-терезелері ауыс­тырылып, жылу жүйесі жөнделеді. Сондай-ақ, кент­тегі №70, қаладағы №17, Ү.Түк­тібаев ауылындағы №88, Бозкөлдегі №96, Ақтан батыр­дағы №190, Ақсуаттағы №100 мектепке, кенттегі «Ақбота», Ғ.Мұратбаев ауылындағы «Бал­дәурен», Қожабақыдағы «Айгүл» балабақшасы мен «Шағала» лагеріне ағым­дағы жөндеу жұмыстары жүр­гі­зіледі. Бірқатар ауыл­дардағы мәдениет үйлері мен клубтар да жөнделеді.

– Кенттің «Аймақаш» ай­­ма­ғынан жер беру үшін дайындалған жобаның қар­жы­сы да шешілді. Енді бұл жерге электр жарығы, газ және ауыз су тарту жұмыстары басталады. Бұл жұмыстар аяқталған соң 115 адамға жер беріледі деп отырмыз. Мемлекеттік атаулы әлеуметтік көмекті төлеуге 237,3 млн, NEET санатындағы жастарға және табысы аз көпбалалы отбасыларға, табысы аз еңбекке қабілетті мүгедектерге жаңа бизнес идеяларды жүзеге асыру үшін гранттарға 103,4 млн, қо­ғам­дық жұмысқа 333,2 млн қаржы қаралды. Баршасы аудан тұр­ғындарының игілігі үшін жа­салынған, – дейді Қазалы ауданы әкімі Мұрат Ергешбаев.

Ауданда жүзеге асуы межеленген мұнан өзге де біршама жоспарлар бар. 

Қазалы ауданы.

Жұмабек ТАБЫНБАЕВ,

«Сыр бойы».

Әлеумет 07 мамыр 2020 г. 147 0