Сыр бойы

Қыркүйек айында ҚР Үкіметі мен «Атамекен» Одағы» ҚҰЭП бірлесіп, Ұлттық кәсіпкерлер палатасын құру туралы шешім қабылдаған болатын. Ұлттық палата кәсіпкерлер құқықтарын қорғау және мүдделеріне өкілдік етуді, өңірлердегі кәсіпкерлік қызмет жағдайының қоғамдық мониторингін жүргізуді қолға алмақ. Сондай-ақ ұлттық палата отандық өндірісті қолдау және ұйымдардың сатып алуларында жергілікті мазмұндағы үлесті арттыруға, кәсіпкерлік субъектілерінің сыртқы экономикалық қызметін ынталандыруға, инвестицияларды тарту және экономиканы әртараптандыруға мүдделі. 

Кеше ҰКП басқарма төрағасы Абылай Мырзахметовтің, облыс әкімінің орынбасары Ғалым Әміреевтің, кәсіпкерлердің өңірлік палатасының директоры Дінмұхамед Әбсаттаровтың, облыс бизнесмендерінің қатысуымен облыстық кәсіпкерлер палатасы өңірлік кеңесінің алғашқы отырысы өтті. Жақында тіркелген кәсіпкерлер палатасының өңірлік кеңесі құрамына Қызылорда қаласынан және  барлық аудандардан 20 кәсіпкер енді.

Отырыста тиімді бизнес ахуал қалыптастыру мәселелері, ұлттық палатаның жоспарлары талқыланды. Басқарма төрағасы кәсіпкерлердің өңірлік палатасы аймақтағы іскер азаматтардың мүдделерін қорғауға, бизнесті дамытуға мүмкіндік жасауға ықпал ететінін айтты. 

«K-Group LTD» ЖШС басқарма төрағасы Қайрат Боранбаев бизнестің дамуына кедергі келтіріп отырған әкімшілік кедергілер, рұқсатнамалар алудың машақаты, қағазбастылық, қаржылық қолдаудың, құқықтық көмектің жетілдірілмеген тұстары туралы ойларын ортаға салды. Енді мұндай түйткілдер палата басқосуларында талқыға түсіп, шешу жолдары ұсынылмақ.

Отырыс соңында кәсіпкерлер палатасы өңірлік кеңесінің төрағасы болып Асқар Махамбетов сайланды.