Сыр бойы

Кеше Қызылордада "Сырдария” лагерінің ашылу салтанаты болды. Отыз шақты жыл бұрын құрылған тынығу орнында жыл сайын 1000-нан астам бала тыныға алады. Балғындардың бос уақытын қызық өткізуі үшін интеллектуалдық, спорттық сайыстар көптеп өткізіледі.

Лагерьдің есігі 1 маусымнан 23 тамызға дейін ашық. 5 маусымда әлеуметтік жағдайы төмен отбасылардың, ал 2 маусымда мұғалімдер мен дәрігерлердің балалары тыныға алады. Қалалық білім бөлімінің басшысы Марат Аралбаев салтанатты шарада:

– 9 ай бойы оқудан бас көтермей, түрлі пәндерден келетін қиын да қызықты тапсырмаларды орындап, білім көкжиектеріңізді кеңейттіңіздер. Келесі оқу жылына жақсы көңіл-күймен, шаршамай барасыздар, лагерьде көптеген достар табасыздар деп сенемін. Жазғы демалыстарыңыз есте қаларлықтай болып өтсін, – дей келе, лагерь ұжымына алғысын білдірді.

Айта кетейік, биыл демалыс орнын жөндеуге 3,9 млн. теңге бөлінсе, оның 1,9 млн. теңгесі материалдық базасын нығайтуға жұмсалған.