Сыр бойы

Халық жазушысы, Мемлекеттік сыйлықтың лауреаты Әбдіжәміл Нұрпейісовтің 90 жасқа толу мерейтойына орай өткізілетін  шаралар жыл соңына дейін жалғасады. Бұл туралы журналистерге арналған баспасөз мәслихатында облыстық ішкі саясат басқармасының басшысы Руслан Рүстемов айтты. 
 
– Сыр топырағында қазақтың әдебиетіне, мәдениетіне, руханиятына үлкен үлес қосқан қаламгерлер мен қайраткерлер көптеп сана­лады. Солардың қатарында әлем­дік ақыл-ойдың қазынасына өлшеу­сіз үлес қосқан қабырғалы қалам­гер Әбдіжәміл Нұрпейісовтің шығар­ма­шылығын насихаттау – бүгінгі ұр­пақтың мерейлі міндеті. Осы орайда облыс әкімінің бастамасымен жазушы шығармашылығын  насихаттауға арнал­ған шаралардың тұжырымдамасы әзірленді, – деді басқарма басшысы.
Бекітілген іс-шаралар жоспарына сәйкес қазан айынан бастап Ә.Нұрпейісов шығармашылығына арналған тақырыптық оқулар, кітап оқырмандарының конференциясы, жастар арасында «Тіл дарын» олимпиадасы өтеді. Студенттерге арналған әдістемелік құрал оқу орындарына таратылады. Бұл шаралар қаламгер шығармашылығының әлемдік әдебиетке қосқан үлесін бағамдауға, насихаттауға  бағытталған.
Білім беру мекемелерінде жазушы шығармашылығы жайында ашық сабақтар, шығармалар байқауы ұйымдастырылады. Оқыр­ман сағаттары мен мұражайлардағы тақырыптық көрмелер туған жерінің табиғаты мен жерлестерінің тыныс-тіршілігін өз туындыларына арқау еткен қаламгерге арналмақ.
Сонымен бірге мерейтойлық бағдарлама аясында «Әбе» фотоальбомы дайындалуда. Онда жазушы өмірі мен шығармашылығының әртүрлі кезеңдерінен фотосуреттер топтастырылмақ. Алдағы уақытта фотоальбомның тұсаукесері Алматы және Қызылорда қалаларында өтеді.